Valevi 14 - BIBILLYA Mareiyo Meele a Iruva

Isangyo lya Nndu Eetiri Woye

¹ Naasa Nndumi Iruva karera na Mose kammbia,

² Elyi llyo ivavasyo lya nndu atirwa ni ivave, elyi mikonu ya yeeremutwa lyakwe, mmbo asheendwaa kwa nkohani,

³ na nkohani nasomuke efo ulaleny nkohani nalole, kwankooya kishavere kya ivave kiwovye,

⁴ llyo nkohani navavasye kweendwa ndeye ivii kimaruma kya yeto asheeremutwa, ndeye ilatiri teve, na nri wa mweresi na mafwaa a yoonri adodorye, na ikongye;

⁵ nkohani navavasye ndeye yeyo imwi ishishwa ivikwa kiiyeny kya uteri kikee kivike mura wa usoka;

⁶ naasa natire ndeye yeyo ikee na muu na kiri ekyo kya kirevellya, na mafwaa yoo adodorye na ikonge, nawe nafyoolote efo samuny ya ndeye ilya yashishywa mureny wa mureny;

⁷ nafwallye nndu yeto ateeremutwa kamfungare, naambe amba nsha, numa narumbute ndeye ilya ikee na muu ikweengye.

⁸ Neeto eeremutwa nasangye masara na yuuta nrwe deny, neesamba neele deny, naasa naangeny neefo ulaleny, lyo nakae yoo poo ya yeema lyakwe ando a mikonu mfungare.

⁹ Numa nkonu wa mfungare noote fii toose ta nrwe, na nguyo, noote fii toose, nasangye soori toose, neesamba deny, neeremukeny.

¹⁰ Nkonu wa nyanya neepoo ngurana ivii ta suva shisha, na uruvi usha lwa mwaaka umwi, na fyenga firaru fya ikumi fya kibaba kya nswa mmamiri, uve kiraso kya nswa, nsasandwa na mafura kikombe kyimwi na mafura maangu,

¹¹ Naasa nkohani yeto asheeremutaa nndu yeto nansaleese ando amwi na findo efyo fyoose yoo mbee ya Nndumi Iruva yoo mbee ya yeema lyeekwaanannya;

¹² naasa nkohani nauteu suva imwi, neenserisa ive kiraso kya urekwa ando amwi na mafura kikombe kimwi, nawe nafiringise five ni kiraso kyeeringiswa mbee ya Nndumi Iruva;

¹³ numa aishishye suva yeyo yoo tishishywa eto ta kiraso kya ulyamari na firaso fyeekora na muro, yoo mmba ando eele, mashika shaasa kiraso ekyo kya ulyamari kikee kya nkohani, niindo-do kivekee kiraso ekyo kya urekwa, mmbo kikee kyeele deny;

¹⁴ naasa nkohani nooteu samu yoo kirasony ekyo kya urekwa naambe kuri ka woko usha ka nndu yeto akeeremutwa yoo mbai, na nni yeto nniini wa woko usha, na nni nniini wa urende elo usha.

¹⁵ Naasa nkohani mmbo ashiipoo kikombe ekyo kya mafura neeletya yoo wokony lwakwe umuso,

¹⁶ numa nkohani navike nni wa woko usha efo mafureny ka mfungare mbee ya Nndumi Iruva,

¹⁷ na mafura yoo asaau naambe yoo mbai ya kuri ka woko usha ka nndu yeto akeeilyiswa, na yoo nniny nniini wa urende usha na nni nniini wa woko usha yoo uwe ya samu ya kiraso kya urekwa;

¹⁸ na mafura yoo asaau akee yoo woko lwa nkohani naletye yoo nrwen wa nndu yeto akeyiilyiswa, na nkohani navike usandi kimaruma kyakwe mbee ya Nndumi Iruva.

¹⁹ Naasa ukohani naserisyeu kiraso kya ulyamari, neevika usandi kwa nndu yeto akeyiilyiswa kimaruma kya utefusu lwakwe, numa nashisheny kiraso kyeekora na muro;

²⁰ numa nkohani naserisyeu kiraso ekyo kyeekora, na kiraso kya nswa, yoo uwe ya kitara ekyo kyeerasya, na nkohani navike usandi kimaruma kyakwe, nawe nailyiswany.

²¹ Na kwankooya ni nkiva nalawonisaa findo efyo, lyo asheende Suva imwi, ive ndalai ya kiraso kya urekwa kyesisika, naambo navike usandi kimaruma kyakwe, na kyenga ikumi kya kibaba kya nswa mmamiri, ukee nsasande na mafura kive kiraso kya nswa, na kikombe kya mafura;

²² na mbeta ivii, ao mabore avii a mbuku, shaasa shiidimaa iwonisa; yeyo imwi ive kiraso kya ulyamari yeyo ya kavii ni kiraso kyeekora na muro.

²³ Kufike nkonu wa nyanya mmbo aveendee kwa nkohani, yoo mwaangony wa yeema mbee ya Nndumi Iruva, kimaruma kya yiilyiswa lyakwe.

²⁴ Na nkohani mmbo awaryaa suva yeyo ya kiraso kya urekwa na kikombe ekyo kya mafura nawe nkohani nafisisike five kiraso kyeesisika kwa Nndumi Iruva;

²⁵ naasa nashishe suva yeyo ya kiraso kya urekwa na kuhani neepoo samu ya kiraso kya urekwa neeyaamba yoo mbai ya kuri kya woko usha kya yeto akeeyiilyiswa, na efo nniny nniini wa woko usha, na nni nniini wa urende usha;

²⁶ naveletya mafura maata yookidawuny kya woko umoso;

²⁷ numa nalete mafura yoo akee wokony lwakwe umuso na nni wakwe wa woko usha ka mfungare mbee ya Nndumi Iruva;

²⁸ naasa nkohani navike mafura engi wokony lwakwe naambe kuri kya woko usha yoo mbai ka yeto akeeyiilyiswa, na yoo nni nniini wa woko usha na nni nniini wa urende usha, yoo uwe ya samu yeyo ya kiraso kya urekwa;

²⁹ na mafura yoo asaa yoo wokony lwakwe naaletye nrwen wa yeto akeeyiilyiswa naambo navike usandi kimaruma kyakwe yoo kwa Nndumi Iruva.

³⁰ Naasa naserisyeu mbeta yeto, imwi ya vayo ao mabore yoo a mbuku lyimwi lya vayo, shaasa ashiidimaa iwonisa;

³¹ shaasa ashiidimaa, imwi ive kiraso kya ulyamari, na ya kavii ive kiraso kyeekora na muro, ando amwi na kiraso kya nswa; na nkohani yeto navike usandi kwa yeto akeyiilyiswa mbee ya Nndumi Iruva.

³² Yeto alwee ivave, nalashiidima iwonisa ekyo kikwaani yiilyiswa kwakwe ivavaso lyakwe llyo elyo.

Ivave lya Mmba

³³ Nndumi Iruva karera na Mose na Aron, kavavia,

³⁴ Kyeeri mushangaa urukeny lwa Kanaani, elo shamuniinga luve lwany, na yeny nsheende ivave isimambeny lya mmba shive,

³⁵ llyo muni mmba yeyo nkuti avie nkohani, sheelyi kwiifo ivave efo mmba yakwe;

³⁶ llyo nkohani ashevavasyaa findo fyoose fikee efo mmba fisomutwa-fo, nkohani eelollye kulore ammaanga mmba ilola naambo efyo fikee efo mmba valesheeva fitefusu; numa nkohani naange mmba yeyo nailole;

³⁷ nawe nalole kindo ekyo, na kwankooya kikee efo isimambeny lya mmba, nakyo kisumikye-mikye, kikafwana mare ao kidodorye, nakyo kirekye si efo isimambeny;

³⁸ llyo nkohani ashesomukaa efo mmba fika mwaangony naraye mmba yeyo ando a mikonu mfungare;

³⁹ Nkonu wa mfungare nkohani mmbo ashendaa lyingi, nalole, kwankooyaa kindo ekyo kikwaani efo isimambeny lya mmba;

⁴⁰ llyo nkohani ashevavia vautefo mawe a ndwari yeyo naeerye poo yoo findo fyeerywa poo ya muri;

⁴¹ nawe naambe mmba yeyo yaaruwa taari toose na yeela yelyo vashuutaafo valyipusuye poo ya muri ando kwa yeerya findo;

⁴² numa woote-fo mawe engyi naavike ando a mawe yoo, nawe neepoo yeela lyingi na yaamba mmba yeyo yeela.

⁴³ Na kwakooya ndwari yeyo yawuya neesha efo mmba kyeeri ammaa yuutafo mawe yoo na yaarwa mmba, na yaamba yeela;

⁴⁴ llyo nkohani ashaangaa mmba nalole, kwankooya kindo ekyo kikwaani efo mmba, ni ivave lyikeelya mmba yeyo, ni shitefusu,

⁴⁵ Nawe mmbo asambwa mmba, mawe a vayo, na mboshiki ta vayo, na yeela lya mmba yeyo, nawe nasomute findo fyoose efo mmba fika yoo findo fyeerwa.

⁴⁶ Na nndu moose yeto ashaangaa mmba yeyo kyeeri ikee shiraye, mmbo avaa ntefusu fika nkwaany.

⁴⁷ Na nndu yeto alolaa efo mmba yeyo nkuti nasangye soori takwe, neeto alyiiyya-fo shoonga kuti nasangye soori takwe.

⁴⁸ Naasa kwakooya nkohani aanga efo mmba neekoya ndwari nnyilekwaana, llyo mmbo ileambwa yeela; llyo nkohani ashambaa mmba yeyo nshaa, mashika ivave lyambova.

⁴⁹ Nawe nkohani mmbo awaryaa ndeye ivii, na nri wa mweresi na mafwaa a yoonri adodorye na ikongye, kya yiilyia mmba yeyo,

⁵⁰ nawe mmbo ashisshaa ndeye imwi nndeeveny uteeri utiri mura wa usoka,

⁵¹ numa naipoo kiri ekyo kya nri wa mweresi, na ikongye na mafwaa a yoonri adodorye na ikongye, ando amwi na ndeye yeyo nafyoolote fyoose samuny ya ndeye ilya yashishwa neefo mureny yeto, nafwallye mmba yeyo ka mfungare;

⁵² nawe neeremute mmba yeyo na samu ya ndeye, na mura wa mureny, na ndeye yeyo ikee na muu, na nri wa mweresi, na mafwaa a yoonri adodorye na ikongye;

⁵³ kyeeri ndeye yeyo ikee na muu mmbo asheira yeende yuuke efo muriny, niindo ashevikaa usandi kimaruma kya mmba yeyo nayo yeeremuke.

⁵⁴ Yelyo llyo ivavaso lya ndwari ya ivave lya wo ngata,

⁵⁵ na lya ivave lya soori;

⁵⁶ neekyo kifumbye na kishavere kyelwa;

⁵⁷ naambo noore elyi ikee shitefusu, na elyi yeeremukya; yelyo llyo ivavaso lya ivave na itaambo.