Valevi 11 - BIBILLYA Mareiyo Meele a Iruva

Findo Fitiri Muu Fishiidimaa Ilyiwa

¹ Nndumi Iruva karera na Mose na Aron kavavia,

² “Rereny na vana va Israeli muvavie, Efi mfyo findo fikee na muu mushelyaa, nnang'ani ya fyuumbe fyoose fikee ulaniny.

³ Ekyo kyoose kitiri mbungashu, urende lubarikye yoo nnang'ani, kirafunnya mura, efo fyuumbeny fyoose mfyo mushelyaa.

⁴ Indi mulasheilya nyama ya kyuumbe kyoose kyirafunyaa mura kwakooya ilatiri mbungashu tikwaavye-fo, ao mbungashu tikwaavye lyo nnyirafunyaa mura-fo. Mlalye Ngamula lla elyi arafunyaa mura lyo mbungashu ntikwaavye-fo. Mulalye-fo ni utefusu.

⁵ Na Mbelele mashika yo mmbo yarafunnya lyo nnyitiri mbungashu-fo, mmbo ikee shitefusu,

⁶ Na sungura na yoda mmbo yarafunnya mura, lyo nnyitiri mbungashu-fo.

⁷ Na nguve, yo mmbo itiri mbungashu tibarikye lyo nnyirafunnya mura-fo; yo nshitefusu.

⁸ Mulalye nyama ta vayo, nta mulafibaani naakwa fifiiye-fo, ntefusu kwany

⁹ “Yefi mushiidimaa ilya, nnang'aani ya yefyo fyoose fya mureny, wo kyindo kya mureny kyitiri maaru na makanda, kwakooya ni fya yeeveny ao mireny, yefyo mumanyeelya.

¹⁰ Lyo kyindo kyoose kya yeeveny ao mureny kilatiri maaru nta makanda, kya nkuka wa fyuumbe fya mureny na findo fiifo na muu fikee mureny, ni utefusu kwany.

¹¹ Ni tefusu kwany, mmulyaa nyama ta vayo-fo na minying'a ya vayo ni tefusu.

¹² Wo kyindo kyilatiri maaru nta makanda mulalye-fo mashika ni tefusu kwany.

¹³ “Na ndeye yeti tive shiravi kwany, tilalyiwa-fo, nshiravi, ngoru, uviri, furukombe, nansha,

¹⁴ na ngata shoose ta makukuru,

¹⁵ wo ikukuru na ngata ya vayo,

¹⁶ na nyaa,

¹⁷ na ifururu,

¹⁸ ndeye ta mureny, nansha

¹⁹ na munyunyu na yeto titivakkye.

²⁰ “Makuru moose atiri maaru na yoo eenda na marende aana, ni matefusu kwany.

²¹ Kimwi neefyo ni efyo fishendaa na si fikatira maaru na yeenda na marende aana, fyo mfisha kwany ilya, fitiri marende maasha ekillya killya efo si;

²² yefyo mutiri muumu weefilya, nrie na ngata ta vayo, na fitelesi fyoose,

²³ Lyo efyo fikurufwaa na si fikavetira maaru na marende aana mfiravi kwany

²⁴ “Neeto ashepaana kindo kifiiye kya efyo, mmbo ammba ntefusu piti fika nkwaany;

²⁵ na nndu yeto asheipoo-u kindo kyoose kya nnying'a mmbo ashevaa ntefusu nkonu piti, na masara akwe ni kuti asangyo.

²⁶ Wo kindo kibarikye mbungashu, nakyo kilatiri mbungashu ivii nta kilarafunnya mare, ekyo nkiravi kwany; nndu kafipaana mmbo ammba ntefusu.

²⁷ Na wo kindo kisheendaa na fidau fya vayo, wo findo efyo fisheendaa efo si na marende aana, ni fitefusu kwany, yeto moose ashepaanaa nying'a wa vayo mmbo aamba ntefusu nkonu piti.

²⁸ Neeto asheipoo nnying'a wa findo efyo mmbo asangyaa masara akwe, naveva ntefusu fika nkwaany, efyo mfindo firavi kwany

²⁹ “Lyingyi efo findony efyo fisheenda na si, mfiravi kwany, fiko, marenya, makokoi, na masosoro,

³⁰ efyo ni findo fitefusu.

³¹ Efyo mfyo fikee fitefusu nnang'ani yeefyo fishendaa na si, nndu ashefipanaa elyi fyanfwa nave ntefusu nkonu piti.

³² Kindo kyoose ekyo kishewiiyaa nnying'a wa vayo mmbo kivaa kitefusu, kyikava kyiiya kya kiri, ao soori, ao shony, ao ikunnya, kiiya kyoose kyikee nkyerunda mashora, nkuti kyoolotwa mbele mureny, mmbo kikee kitefusu fika nkwaany, llyo kikooyeny iva kisha.

³³ Na kiiya kyoose kya uteeri, kindo sheekyo kikashewoya, wo kindo kiifo mmbo kishevaa kitefusu, na kiiyo ekyo kifishwa.

³⁴ Wo shoonga yeifo yeelya, ikeekorwaa na mura eto mmbo ivaa shitefusu, na ekyo kyeena kikee kiiyeny ekyo mmbo kivaa kitefusu.

³⁵ Wo kindo kyoose ekyo kishepaanwa ni nnying'a wa vayo mmbo kivaa kiravi, nakyo kifishwa-fishwa.

³⁶ “Ando amwi neefyo, usoka ao kirori kya mura mmbo fivaa fisha, kuuta ekyo kyapaana findo fifiiye.

³⁷ Kindo kyauka efo kindony kifiye kikapaana mbeu teevaayo, to ntiwore mwaandu-fo,

³⁸ lyo kwankooya tabaanwa tikee mureny, llyo tivaa shiravi.

³⁹ “Kwakooya kindo kyoose ekyo mutiri muumu welya, kyikafwa mmutiri mumuu weekilya-fo, yeto ashekipaanaa mmbo atefukaa kufike nkwaany.

⁴⁰ Neeto ashelyaa nyama ya vayo mmbo ashesangyaa masara akwe, naveva ntefusu kufike nkwaany, na nndu eepoo ekyo kifiiye nasangye masara akwe naveva ntefusu kufike nkwaany.

⁴¹ “Ekyo kyo kikurufwaa si mmbo kikee kitefusu; kilalyiwa-fo.

⁴² Ekyo kishendaa na ndeu, na kishendaa na marende aana, na kishendaa na marende meengi, ni efyo fyoose fikurufwa si mulafilye-fo, mfitefusu.

⁴³ Mulashekureveesa na kindo kyoose kikurufwaa si, mukooye iraveeka.

⁴⁴ Mashika yeny ni Nndumi Iruva, Iruva waany, kwiilyiseny, veny veele, mashika neen mmbo shikee mweele, nta mulakutefuse muveni na kindo ekyo kikurufwaa si.

⁴⁵ Mashika yeny ni Nndumi Iruva shilemuuta kulya Misri, naambo shive Iruva waany, naasany mmbo mushevaa veele shaasa neeny shikee mweele.

⁴⁶ “Naasa elyo llyo ivavaso lya findo efyo na ndeye na wo kindo kikee na muu, na kikee efo mureny, na kikurufwaa efo si;

⁴⁷ naambo murauwe ekyo kisha na kitefusu, neekyo kikee na muu kivaa ilya, neekyo kilalyiwaa.”