Valevi 1 - BIBILLYA Mareiyo Meele a Iruva

Firaso Fyeekora Fyoose

¹ Nndumi Iruva kavaanga Mose, karera nawe ekee alya yeemeny lyeekwaanannya, kammbya,

² rera na vana va Israeli kuvavie indi, kyeeri nndu wa kwany ashuutyaa Nndumi Iruva firaso, mmbo ashuuta irondeny lya findo fyakwe fyeevikya, mfyo ng'umbe, moonri na mburu.

³ Kwakooya kiraso akeeiniingya nndu nkyeemamita na muro, mmbo asauwaa shau shisha efo irondeny lyakwe ilatiri mbese; neende yoo mwaangony wa yeema, naambo awonise mbora yuuka kwa Nndumi Iruva.

⁴ Naasa neekere woko lwakwe yoo nrony wa kiraso ekyo kyeekora na muro; nayo yiirikyo kimaruma kyakwe, kive kya usandi kwakwe.

⁵ Nawe mmbo asheshishaa ng'umbe yeyo yoo mbee ya Nndumi Iruva. Na vakohani vana va Aron, vasembere samu yeyo, vaifwallye taari toose ta kitara kya-irasya ekyo kyiikee yoo mwaangony wa yeema elyo.

⁶ Nawo narumbwe fyenga fyenga.

⁷ Naasa vana va Nkohani Aron, vavike muro yoo kitareny kyeerasya, na yaala ngwi uwe ya muro,

⁸ lyo vana va Aron, mmbo vakohani, vaale fyenga fyilya fya nyama yoo uwe ando amwi na nrwe na mafura a vayo, vavike yoo uwe ya ngwi na muro yeto yoo kitareny kyeerasya;

⁹ kyeendi maala a vayo na marende, nafisangye na mura, na nkohani mmbo shefirumataa na muro fyoose yoo kitareny ekyo, llyo fyava kiraso kyeekora na muro, ni kiraso kyeeserisya murony, kitiri nrungo nsha usenyi kwa Nndumi Iruva.

¹⁰ Na findo fyakwe fya pya kwakooya mmbo fyauka efo irondeny lya moonri ao lya mburu five kiraso kyeekora na muro naniingye ekyo kya kyuumi kilatiri teve.

¹¹ Nawe mmbo asheishishyaa yoo taari ya ndoo ya kitara kyeerasya usanguny lwa Nndumi na vana yewo va Aron wa Makuhani valetye samu ya vayo yoo uwe ya kitara ekyo taari toose.

¹² Na numa ya vayo nairumbwe fyenga ando amwi na nrwe wa vayo, na mafura a vayo; nawe nkohani nafyaale yoo uwe ya ngwi yeto tikee uwe ya muro ukee uwe ya kitara kyerasya;

¹³ kyeendi lyo maala a vayo na marende a vayo, nafisangye na mura, nawe nkohani mmbo ashefiserisaau neefimamita na muro yoo uwe ya kitara ekyo, ni kiraso kyeekora na muro, kiraso kyeserisya Nndumi Iruva na muro, kitiri nrungo nsha usenyi kwa Nndumi Iruva.

¹⁴ Na findo fyakwe fya pya efyo asheutyaa Nndumi Iruva five kiraso kyemamita na muro, kwankooya n-ndeye, mmbo asheendee mbeta ao fivana fya mbuku.

¹⁵ Nkuhani nafyeende na yoo kitareny kyeerasya nafimushwe njwaa, neefimamita na muro yoo kitareny, lyo samu ya vayo naishoshotye efo mbai ya kitara ekyo;

¹⁶ naawo mmbo asheutaafo maala a vayo nashefyeerya yoo ifuny taari ya ngama ya kitara,

¹⁷ numa nakibare nnang'ani na maaru alasheeuutwaa-fo-fo, lyo nalabare five fibarwe fivii-fo, llyony nkohani nafikore na muro yoo kitareny uwe ya ngwi na muro, nkyo kiraso kyeemaamita na muro, kyeeserisya Nndumi Iruva na muro kitiri nrungo nsha kwa Nndumi Iruva.