VALETI 7 - BIBILLYA Mareiyo Meele a Iruva

Gidion Avinga Vamidian

¹ Naasa Gidion na vandu vakwe vakafuma ngama shuru, vakandemannya ulale alya kufii na usoka lwa Harodi. Nayo kambi ya Vamidian mmbo yeekee taari ya ndoo kufii na ifumbu lya More efo imungony.

² Nndumi Iruva kavia Gidion, “Vandu yeva vafo mmbo vakee veengyi nnu ivika Vamidian maakony awo, mashika numa mmbo vasheammbaa ni elyi veekee veengyi, Israeli vakushobe nakyo.

³ Naasa enda kwandevia vandu yeva woose, Nndu moose yeto atirwa mmbweerei nawuye na kyeny, nooke ya Gileadi.” Naasa vandu fiku makumi avii na fivii vakawuya, vakasaa-u vandu fiku ikumi.

⁴ Nndumi Iruva kasheviase Gidion, “Naako ni yewo vasaa-u mmbeengyi nnu. Veende vashena mura, nsheveesya yoo mureny. Na yeto nshekuviaa yeu neende neewe, mmbwe asheendaa neewe. Na yeto nshekuvia yeu nnyasheendaa neewefo, nawe nnyasheendaa-fo.”

⁵ Naasa Gidion keende vandu mureny. Nndumi Iruva kavia Gidion, “Nndu yeto ashekommbaa sha kite, mmbike mmbai, neeto ashefiirya ndi ina mura kummbike mmbai.”

⁶ Vandu valekommba mura mmayana araru, lyo yewo vengyi woose mmbo valefiirya ndi vakanany.

⁷ Naasa Nndumi Iruva kavia Gidion, “Vandu yeva mayana araru valekommba mura sha fite mmbo nshemukiraa yeni shivike Vamidian maakony any. Lyo vandu yewo vengyi woose veende kyeny.”

⁸ Naasa vandu valya mayana araru vakeeboo shoonga tawo, na maranda awo. Nawe Gidion kavia vandu woose va Israeli veende kyeny, kasaa na valya veni mayana araru. Na ulale lwa Vamidian mmbo lweekee kulya imungony.

⁹ Naasa kio ekyo kyeni Nndumi Iruva kavia Gidion, “Kwiiboo, enda kulya ulaleny lwawo mashika mmbo shammbavika maakony afo.

¹⁰ Lyo kwankooya kweereiye, oloka mbele na nndundi wafo Pura,

¹¹ mundearannya shaasa vakeerera, llyo neewe kukaaryaa, kundeolokany nafo.” Naasa kooloka neefo ulaleny lwawo we na Pura vakakooya na vandu yewo varye fisha.

¹² Vamidian na Vaameleki na vandu yewo va taari ya ngama mmbo veekee imungony, veengyi sha nrie, nta ngamula tawo tilavaa yeekyena, sha nsanga.

¹³ Kyeeri Gidion alefika-fo keeta nndu akeevia ungyi yoorya lyakwe, kammbia, “Mmbo shileorya nkate wa nganu mmbo ulewa ulaleny lwa Vamidian, ukakaba yeema lyimwi nalyo lyikawa si.”

¹⁴ Yeto ungi kammbia, “Kindo ekyi ni usu lwa Gidion mwana wa Yoashi, nawe ni nndu wa Israeli. Iruva mmbo ammbika Vamidian na itorito lyawo woose maakony akwe.”

¹⁵ Naasa Gidion eekiita mbony ta yoorya elyo na urango lwa vayo, kafiirya ndi, kawuya kulya ulaleny lwa itorito va Israeli, kavavia, “Iluyeny lweende mashika Nndumi Iruva mmbo ammbika ironda elyo lya Vamidian maakony any.”

¹⁶ Naasa kaava vandu valya mayana araru fironda firaru, kavaniingya maranda woose, na nungu tilatiri mura lyo titiri fimwii fya muro.

¹⁷ Kavavia, “Shiloleny naambo mutane indo shaasa nkeetana yeny, Kyeeri nshefikaa yoo ulale lumandi, mutane shaasa nkeetana.

¹⁸ Shankaba iranda yeny neewo vakee neeny, naasa neeni kabeny taari toose, mwaambe, Ni Nndumi Iruva na Gidion.”

¹⁹ Naasa Gidion na vandu valya iyana veekee nawe, vakandefika alya ulale lumandi, kio nnang'ani, vakakaba maranda awo, vakaaba na nungu tilya.

²⁰ Fironda efyo firaru fyoose fikatana indo vakakaba maranda, neebabara nungu, vakatira fimwii na woko umuso na maranda vakatira na woko usha. Vakakaba kilewa vakaammba, “Ekalu usu lwa Nndumi Iruva na lwa Gidion.”

²¹ Wo nndu kasalala ando akwe vakaringitya ulale lwa Vamidian taari toose, itorito lyoose lyikarisha, nawo vakavavinngya.

²² Vakakaba maranda alya mayana araru na itorito lya Vamidian vakeenda veekuwaa wo veni na ngyusu shaasa Nndumi Iruva alevafuluta. Vakarisha fika Betshita taari ya Serera fika nnyanu wa Abel-mehola, kufii na Tabati.

²³ Womi va Israeli va Naftali na Aseri na Manase mmbo veekusang'irye ando amwi, naasa vakavingya Vamidian.

²⁴ Naasa Gidion karuma nrumi koose urukeny lwa mafumbu lwa Efraimu yaammba, “Uviny olokeny mweende Midian mundetira ngyusoka yeto fika Bethbara na Yordan.” Naasa vakooloka vakandetira mira yeyo myoose fika Yordan.

²⁵ Vakandetira vashilyi yewo va Midian Orebu na Seeba, vakawaiya Orebu alya iweny lya Orebu, na Seebu we vakandembwayya miraariny ya mfinyo wa Seebu. Naasa vakeengera ivingya Vamidian. Mirwe ya Orebu na Seebu mmbo valeenngye Gidion efo kwakulya ya Yordan.