VALETI 4 - BIBILLYA Mareiyo Meele a Iruva

Debora na Baraka

¹ Naasa Ehudi ekifwa, vana va Israeli vakalyamarya lyingi Nndumi Iruva.

² Nndumi Iruva kavavika maakony a Yabini mangyi ya Kanaani, eekeeshillya Hasori, na ungyi ni Sisera eekee Harosheti wa Masanga, mwiisalallya itorito vakwe.

³ Vana va Israeli vakafuuya Nndumi Iruva, mashika Sisera mmbo eetiri mitika a minya mayana kyeenda, kalyisa vana va Israeli ukyiva ando a myaaka makumi avii.

⁴ Naasa llyo nkisuku wa kyika Debora, eekee nka wa Lapidoti, kava mmbwe mwiileta Israeli kyeeri ekyo.

⁵ Nawe mmbo eeshivye ikaa rembo kwasi ya yaangashi lyakwe, yoo nnang'ani ya Rama na Beteli, kulya urukeny lwa mafumbu lwa Efraimu, Naasa vana va Israeli vakanderwa nafo naambo navalete.

⁶ Naasa Debora karuma kundevaangwa Baraka wa Abinoam wa kulya Kadesh-naftali, kammbia, “A Nndumi Iruva wa Israeli nshi alevavasya eeshaammbaa, ‘Endavaondwe vashe na kwafo yewo va ifumbu lya Tabori fiku ikumi vana va Naftali na va tablon?’

⁷ Neeny mmbo nshekweengyee Sisera nniini wa itorito va Yabini, fika mura wa Kishoni, na mitika, na nkuka wa vandu vakwe, neeny nshevavika maakony afo,”

⁸ llyo Baraka alemmbia, “Kwankooya kusheendaa neeny, llyo yeny nsheendaa. Lyo kwankooya kulasheendaa neeny, yeny nshisheendaa-fo.”

⁹ Nawe kammbia, “Nkuti sheende neewe, indi manya kyaaro ekyi nkishekuningaa nnduma yewe-fo, kimmba Nndumi Iruva ashevikaa Sisera maakony a nndu nka.” Naasa Debora keenda na Baraka fika Kedeshi.

¹⁰ Naasa Baraka kasang'irya vandu va Naftali na va Sablon veende Kedeshi vakarwa nawe vandu fiku ikumi, na Debora keenda aryani nawo.

¹¹ Naasa nndu umwi evaangwa Heberi Mkeni, enkaa kwaasha na Vakeni, mmbo vana va Hobabu, ekee nkwe wa Mose, nawe mmbo eevikye yeema lyakwe miriny ya Saanaimu kufii na Kedeshi

¹² Naasa Sisera kasheenngye mbony ta yaammba Baraka wa Abinoam mmbo anrwa na ifumbuny lya Tabori.

¹³ Llyo Sisera alesangirya mitika akwe moose a minya mayama kyeenda, ando amwi na vandu vakwe woose uka Harosheti fika nnyanu wa mura Kishoni.

¹⁴ Naasa Debora kavia Baraka, Uviny, kuboo, mashika inu llyo nkonu Nndumi Iruva ammbika Sisera maakony afo. A Nndumi Iruva nshi we akusongoye? Naasa Baraka kasoka na ifumbuny lya Tabori aryani na vandu fiku ikumi.

¹⁵ Nawe Nndumi Iruva kasaveesa Sisera na mitika akwe moose na itorito lyakwe, vakawaawa mbee ya Baraka, nawe Sisera kooka efo ikariny lyakwe karisha na marende.

¹⁶ Llyo Baraka alesora itorito yewo na mitika awo, fika Herosheti, na itorito va Sisera woose vakawaawa, kulasae-u nta nndu umwi.

¹⁷ Lyo we Sisera karisha na marende kandefika kwa Yaeli mmbwe nkwe wa Heberi, Mkeni, mashika elyi Yabini kweifo ufoo kwa Hasori na kwa Heberi Mkeni.

¹⁸ Naasa Yaeli kakuboo nandeammbya Sisera kammbia, “Kusheye kwakwa woi mbee kulairyae-fo.” Kaanga neefo yeemeny kwakwe kanniinga isara lyeeraa.

¹⁹ Kammbia, “Shakutereva mura weena mashika ntirwa nnyura.” Nawe Yaeli kafunnwa shupa ya malela kalletya kana,

²⁰ Nawe Sisera kavia Yaeli, “Mmbo kusalalaa yaa mwaangony wa yeema, na kwakooya asha nndu nakuvese kwakooya kwafo kwiifo nndu, llyo kummbie, Oode.”

²¹ Llyo Yaeli nka wa Heberi aleipoo kyaasi kya yeema, keeboo na kirya kansora waarya, kakabya kyaasi kilya efo kisanguny kyakwe, kyikaanga kikandetira si, mashika mmbo eerekye ron kulu. Naasa kafiiya alya kweni.

²² Naasa na Baraka nawe mmbo eefo evingya Sisera kundo eera nafo, llyo Yaeli alellollya kandemwaambya, kammbia, “Nkye oshoony naambo shikoore nndu yeto kwiifo kunduuyaa.” Naasa elyi eenda nawe, pari-pari akakau Sisera mmbo amaa ifwa, na kyaasi ekyo kikee kisanguny kyakwe.

²³ Kyasiany, niindo Iruva alevinga Yabini we mangyi ya Kanaani, maakony a Israeli.

²⁴ Naasa vana va Israeli vakeengera itira finya ngota Vakanaani, na kutani valemamita mangyi yaawo Yabini.