VALETI 3 - BIBILLYA Mareiyo Meele a Iruva

Masanga Alesaa Kulya Urukeny

¹ Vandu Nndumi Iruva alevara naambo vave kyeeso kwa Israeli mmbu yeva, Nawe mmbo aletana indo valya valandelollye fira ta Vakanaani valollye ulaalu,

² naambo marika a vana va Israeli akooye imanya vavekulosha na fira, mmbu yewo valandelollye fira fika ulaalu,

³ Vandu yewo ni vamangyi varaanu va Vafilisti, na Vakanaani woose na Vasidoni, na Vahifi valya valekaa ifumbuny lya Lebanon, uka ifumbu lya Baal-hermoni fika Hamati.

⁴ Nndumi Iruva kavara naambo neese nawo Israeli, nalole kwakooya vashaarannyaa mavavaso akwe aleniinga vakuu vawo na woko lwa Mose.

⁵ Naasa vana va Israeli vakakaa na Vakanaani, yewo mmbu Vahiti na Vaamori na Vaperis na Vahifi na Vayebusi.

⁶ Nawo mmbo valeora vana va vana vawo va kyika vakavaninngya vasero vawo, naasa vakarunndya na maruva awo.

Otinieli

⁷ Vana va Israeli mmbo valelyamarya Nndumi Iruva vakanrekyo we Nndumi Iruva waawo, vakarunndya maruva a wongo Mabaali na Maashtoreti.

⁸ Nndumi Iruva karooywa ni unyafi kimaruma kya Israeli nawe kavavika maakony a Kushan-rishataimu ekee mangyi ya Mesopotamia, nawo vana va Israeli vakarunndya mangyi yeto Kushan-rishataimu ando a myaaka nyanya.

⁹ Naasa vana va Israeli veekifuuya Nndumi Iruva, nawe kavarikya mwiivakiran, mmbwe Otinieli mwana wa Kenasi ndeye n-du wa Kalebi.

¹⁰ Mumuyo wa Nndumi Iruva ukankaya kaleta Israeli, keenda fireny. Nawe Nndumi Iruva kavika Kushan-rishataimu wa Mesopotamia maakony akwe nawe kammbinga.

¹¹ Israeli kakaa na ufoo ando a myaaka makumi aana sele. Numa Otinieli kafwa.

Ehudi

¹² Naasa vana va Israeli vakawuya ilyamarya Nndumi Iruva, nawe Nndumi Iruva kaniinga Eglon mangyi ya Moabu finya naatare Israeli mashika elyi valellyamarya.

¹³ Mangyi Eglon kasang'irya Vaamoni na Vaamaleki kandekaba Israeli vakavasoka muri yeto wa myaangashi, nto Yeriko.

¹⁴ Nawo Vaisraeli vakashillyo ni mangyi Eglon wa Moabu ando a myaaka ikumi na nyanya.

¹⁵ Kyeendi kyeeri vana va Israeli valefuuya Nndumi Iruva, Nndumi Iruva kavaniinga mwiivaleta, ni Ehudi mwana wa Gera, wa ufyari lwa Benyaminy. Naasa vana va Israeli vakarikya mangyi Eglon findo fya pya.

¹⁶ Nawe Ehudi ensongosia usu lwa nkwakuvii waasha lwa marambo aana, kalusikya isareny efo shoro.

¹⁷ Na kaningya Elgony mangyi ya Moabu simbo. Ulaalu Elgony mmboyekee nndumi mmbongye deny.

¹⁸ Naasa Ehudi eekimaa irambikya mangyi findo efyo kasama vandu valya veentarye.

¹⁹ Naasa Ehudi kainduka kavia mangyi Eglon, “Woi mangyi, mmbo shirye nrumi ya kirika shikundye ikuviany.” Nawe mangyi kavia vandu valya veeselelyi-u vauke-u vavareeye mwanya.

²⁰ Naasa Ehudi kasora mangyi yoo kiryeny kyakwe ando afoo sau kammbia, “Woi mangyi mmbo shirye rumi yafo yuuka kwa Iruva. Mangyi eeta indo kasalala shumu.”

²¹ Ehudi koorwa woko lwakwe, kasomwa usu lulya yoo shoro, kadosha nalo mangyi ndeu vyaa,

²² usu yelo lukasiiya-fo na munyi wa vayo, mafura a uvambu akasikkya usu, nalo nalalusomwefo mashika mmbo luleera fika mungo.

²³ Kiikiva indo Ehudi kasomuka na boo, karaya myaango na ufunguo.

²⁴ Elyi amaa isomuka nawo mashinga a mangyi akasha, vakakooya shaasa myaango ikeemifinge, vakakusara kulakooye mangyi mmbo akeemaama.

²⁵ Vakairisha-u vakaara, nta myaango ilaruwa, Naasa vakeeboo ufunguo vakarua, valola indi vakaawukwa mmuu elyi vakooya nndumi waawo ankufiikya yoo si ammaa ifwa.

²⁶ Kyeeri kilya veefo veeveraa Ehudi kaangusya irishya Seira.

²⁷ Akifika-fo kaangusya ikaba iranda efo urukeny lwa mafumbu lwa Efraimu, vana va Israeli vakaoloka veerishaa kavasongoya

²⁸ Kavavia, Uviny, shisoreny, shivingyeny, mashika loleny inu Nndumi Iruva ammbika vakiduva veru wo Vamoabu maakony eru. Naasa vakavingya veensoraa, vakandetira alya irikony ando eeruuka Yordan, valalekeye nta undu naruuke nang'u.

²⁹ Naasa vakakaba Moabu vakawaa womi sha fiku ikumi indi, vandu vawongye vakaari va fira. Lyo nalakye-u nta nndu.

³⁰ Niindo Vaisraeli valevinga Moabu. Nalo uruka lukatira ufoo ando a myaaka makumi nyanya.

Shamgari

³¹ Numa ya Ehudi kasha Shangari mwana wa Anati, we mmbo ekaba Vafilisti, kawaa womi mayana arindaru na wombe lwa ng'umbe, kaauwa Vaisraeli.