VALETI 21 - BIBILLYA Mareiyo Meele a Iruva

Vaka va Ufyari lwa Benyaminy

¹ Nalyo vandu va Israeli woose mmbo vellya mboo alya Mispa, vakaamba, “Nkwiifo muumu nndu wa Israeli naniingye mwana wakwe noorwa ni nndu wa Benyaminy-fo.”

² Nawo vakasherwa mbee ya Iruva kulya Betheli vakakaba kiiyo kiniini nnu.

³ Vakaamba, “Woi Nndumi Iruva wa Israeli, a nkyiki-dwa elyi kindo ekyi kiroo indi kilewoya Israeli, nang'u kukooka-u ufyari lumwi kunu Israeli.”

⁴ Nalyo elyi lya ndesi vandu yewo vakakwiiboo ngama nraasi, vakatana kitara kyeerasya, vakootya-u firaso feekora na muro na firaso fya ufoo.

⁵ Vana va Israeli vakaamba, “Kunu ngyufyariny ta Israeli ni ufyari lungalu kulore lwasheenndya Nndumi Iruva yaa?” Mashika mmbo valelya mboo vakaamba, Yeto araa nalesheenndya Nndumi Iruva yoo Mispa mmbo awaawaa, dede deny.

⁶ Vana va Israeli vakavavyo nriminy nnu kimaruma kya ufyari lwa Benyaminy, vakaammba, ulaalu ufyari lumwi lwamuuka kunu Israeli.

⁷ Alukatana inda Luwonisye womi yewo valesaa-u vaka, mashika lyo mmbo lwellya mboo lukaammba lluvaniingaa vana veru vavarwaa-fo.

⁸ Vakaamba, “Ni ufyari lungalu lwa Israeli kulore lweeiyo alya Mispa?” Na vakakooya ate! Nkwiifo nndu alesha alya ulaleny aleuka Yabesh-gilead nashe ikwaanuny-fo.

⁹ Mashika llya valeekyeno nkweiyo nta nndu umwi wa Yabesh-gileadi-fo.

¹⁰ Naasa llyo ikwaanu elyo lya vandu lyikarumafo vandu fiku ikumi na fivii wooka efo vanduny yewo vakaari deny, vakavavia, Endeny mundekaba vandu yewo va Yabesh-gileadi, mukabe na vaka vawo na vana vadu.

¹¹ Mukammeenda mmbo muwaa womi woose na vaka yewo valenkaa na womi.

¹² Efo Yabesh-gileadi vakawonisa-fo vana va kyika mayana aana-nsi valaishi womi, vakandevarwaa ulaleny kulya shilo, urukeny lwa Kanaani.

¹³ Naasa llyo ironda elyo lya vandu lyileruma vandu vanderera na vandu va Benyaminy yewo veekusurumye kulya iweny lya Rimon vakavavia, “Kukaeny na Ufoo.”

¹⁴ Naasa va-Benyaminy yewo vakawuya, Israeli vakavaniinga vana valya va kika valevanta kulya Yabesh-gileadi, lyo mmbalevamaa-fo, womi vakaingifwa mmwasi.

¹⁵ Vandu vakarovyo nriminy kya Benyaminy, mashika elyi Nndumi Iruva aleuta Benyaminy yeekeniny lya Israeli.

¹⁶ Llyo vasongoru va vandu valeammba, “A lukatana inda naambo luwonisye yewo vengyi vaka? Mashika efo Benyaminy nkwiifoo vaka-fo, mmbo valewaawa woose.”

¹⁷ Vabenyaminy yewo valeturunya nkuti vaonise vayading'u naambo ufyari lwa Benyaminy lulareke kulu kunu Israeli.

¹⁸ Lyo llushiidimaa ivaniinga vana veru-fo, mashika Israeli valelya mboo vakaammba, “Yeto aniingaa nndu wa Benyaminy nka mmbo avaan-denge.”

¹⁹ Llyo valeammba, “Shaasa lwiishivye mmbo kwiifoo sukukuu wo mwaaka kulya Shilo, nafo n'taari ya ndoo ya Betheli, mfo taari ya ngama ya shia yeyo yooka Betheli fika Shekemu, na taari ya sinde ya Lebona.”

²⁰ Naasa vakavia vana yewo va Benyaminy, “Kyasia endeovyeny kulya mareminy a misabibu muvereye-fo,”

²¹ kyeeri vana va kyeny va Shilo vasomukyaa indefina efo sukukuuny, llyo musomuke efo mareminy a misabibu, wo nndu naware-u nka yeto ankunda efo vaniny va Shilo muwuyeny na urukeny lwa Benyaminy,

²² Nalyo elyi vande vawo ao vandu vawo vashevasoraa kya mwaandu, yese luvavie, “Lusaryeny, mashika llulevatirya fireny-fo, nta nshi mulevaniingya yeni-fo, kive indo uvingo mmbo lweevaa lwany.”

²³ Naasa vana va Benyaminy vakatana shaasa valeolonngyo, wo umwi kawonisa nka vaniny va kyeny valya valefina. Vakeenda nawo. Naasa vakawuya urukeny lwa Benyaminy vakapooka itana-se miri ilya yaawo neekaa-fo.

²⁴ Kyeeri ekyi vana va Israeli vakandekaa wo nndu efo ufyariny lwakwe, kyeny kwakwe muni, ding'uny yakwe.

²⁵ Lyo Israeli nkweefo mangyi-fo. Wo nndu mmbo aletana ekyo kilensennya we muni.