VALETI 12 - BIBILLYA Mareiyo Meele a Iruva

Yefta na Vandu va Efraimu

¹ Naasa vandu va Efraimu vakakusang'irya naambo varwe na ndoo, vakavia Yefta, “A nkyiki elyi kulendekabana na Vaamoni kulore kwaluvia?”

² Nawe kavavia, “Mmbo kweeiyo ikoosa iniini nnu lya vandu vakwa na Vaamoni, neeny shamuvaanga mulasheeshauwa.”

³ Neeny shiikilollya mmukeesha, shaangusya iruuya ikia muu, sharuuka indekabana na Vaamoni, nawe Nndumi Iruva kashisongoya, A ulaalu nkyiki elyi yeni ulaalu mwakunda ikabana neeny?

⁴ Naasa llyo Yefta aleummbya vandu woose va Gileadi naambo vakabane na vandu va Efraimu. Vandu va Gileadi vakavakaba mashika elyi valeveenyala vakavavia, yeni Vagileadi mmbo mukee vana varishye kyeny kwa Efraimu mukakaa yoo nnang'ani ya Efraimu na Manase.

⁵ Naasa Vagileadi vakatira mariko yoo eeruuka Yordan moose naambo Vaefraimu valaruuke nafo. Nawo efo Efraimu elyi nndu alekunda irisha-fo na yaammba, “Shira shiruuke mura, vandu va Gileadi mmbo valemmbesa, Ndesa yeve ni Mweefraimu?” Kaammba, “Woode.”

⁶ Vakammbia, “Kyesenda ‘Shiboleti nawe kaammba Siboleti mashika mmbo veelemyo deny isenda irero elyo shawo. Llyo vakantira neemmbwaa yoo irikony lya Yordan. Naasa fira yei ikawaa vandu fiku makumi aana na fivii.’”

⁷ Nawe Yefta kaleta na isalallya vana va Israeli ando a myaaka irindaru, kafwa karikwa efo Gileadi.

Ibsan, Elon, na Abdon

⁸ Numa yakwe kasha Ibsani wa Betlehemu kava mwiileta wa Israeli.

⁹ Nawe mmbo eetiri vana va kyuumi na vakika nawe kavarwaa kwaasha, nawe keende vaka wooka kwaasha vave vaka va vana vakwe. We Ibsani kaleta Israeli ando a myaaka mfungare.

¹⁰ Ibsani kafwa, kaarwa kulya Betlehemu.

¹¹ Numa yakwe ni Eloni wa ufyari lwa Sabulon, nawe kavaleta ando a myaaka ikumi.

¹² Eloni kafwa, nawe kaarwa efo urukeny lwa Sablon muriny wa Aiyaloni.

¹³ Numa yakwe kasorya Abdon mwana wa Heleli ookye Piraton kaleta Israeli.

¹⁴ Nawe mmbo eetiri vana na vashuku wo umwi kasaama nshungu wakwe. Nawe Abdon kasalallya Israeli ando a myaaka nyanya.

¹⁵ Abdon yeu mwana wa Hileli wa piratoni kafwa, kandearwa kulya Piratoni urukeny lwa Efraimu mafumbuu a Vaameleki.