VALETI 11 - BIBILLYA Mareiyo Meele a Iruva

¹ Naasa kweefo nndu umwi nkaari wa ufyari lwa Gileadi, irina lyakwe ni Yefta, maaye mmbo ekee nka wa shia na ndeye ni Giliadi.

² Ndeeye Gileadi, nawe mmbo eetiri vana vengyi va nka wakwe. Nawo vana yewo vakwe elyi valengana vakavia Yefta, “Yewe nkutiri ding'u yaa kwa ndeeru-fo, mashika mmbo kukee mwana wa nka ungyi.”

³ Llyo Yefta karishafo nalakikaese na vana va ndeeye, keenda uruka lwa Tobu. Na vandu vafiri vakeenda veeriani na Yefta.

⁴ Elyi numa vana va Amoni vakashekabana na Israeli.

⁵ Na kyeeri valekabana nawo, vasongoru va Gileadi vakandeonndwa Yefta kulya urukeny lwa Tobu.

⁶ Vakammbia, “Osho-te yewe kulusongoye lundekabana na Vaamoni.”

⁷ Yefta kavia vasongoru yewo va Gileadi, “A yeni nshi muleshiswa mukashifuna efo mmba ya ndeyaakwa? Mmbo kyavaany inda ulaalu isheshisora kyeeri mutiri ukiva?”

⁸ Vasongoru yewo vakavia Yefta, “Yee, ulaalu kimaruma kya ukiva llyo mirima yeeru yakuwuiya yewe naambo kweende neese indekabana na Vaamoni. Neewe mmbo kushevaa nsongoru weeru efo ufyariny lwa Gileadi loose.”

⁹ Naasa Yefta kavavia, “Kwakooya ulaalu mukeeshiviira kweru naambo lundekabana na Vaamoni, na kwakooya Nndumi Iruva avafuna mbee yeeru, ndesa nshevaa yeny ni nshilyi waany?”

¹⁰ Vasongoru va Gileadi vakammbia, “Yee, na Nndumi Iruva mmbwe yeto akee nkureeki weeru, neese nkuti lutane indo.”

¹¹ Naasa llyo Yefta alekupoo na vasongoru yewo va Gileadi, na vandu va Gileadi vakambika nniini waawo, kava mangyi waawo, Yefta karera nawo ekayo ni Nndumi Iruva efo Mispa.

¹² Naasa Yefta karuma vandu veende kwa mangyi ya Vaamoni, kaammba, “Nkyoki kikutiri neeny kutani kwashisheya ishekabana na vandu vakwa?”

¹³ Mangyi wa Vaamoni kavarouwa, kaammba, “Mmashika elyi Vaisraeli valetira uruka lweru kyeeri kilya valeuka Misri, pookya Arnoni fika Yaboki na fika Yordan. Naasa ulaalu viiran uruka yelo noofoo.”

¹⁴ Nawe Yefta karuma vandu lya kavii vee nde kwa mangyi ya Vaamoni,

¹⁵ Kammbia, “Yefta akuvia indi, Israeli mmbaletira uruka lwa Moabu nta uruka lwa vana va Amon-fo,”

¹⁶ lyo kyeeri Israeli valesaama wooka Misri nawo vakashefika kasa ka Yeeve ya Siria, neefika Kadeshi,

¹⁷ llyo Israeli valeruma vandu kwa mangyi ya Edomu, vakaammba, “Mmbo shakutereva-dwa kushiniinge muumu wa yiira urukeny lwafo, Lyo mangyi ya Edomu kalema. Na mangyi ya Moabu, kalema. Naasa Vaisraeli vakakaa mbele alya Kadeshi.”

¹⁸ Naasa vakaringitya kasa ka Edomu, na Moabu vakakaa taari ya Arnon vakamanya ulale fika nnyanu wa Moabu.

¹⁹ Naasa Israeli vakarumbo vandu kwa mangyi Sihoni wa Vaamori, na mangyi ya Heshboni, Israeli vakammbia, “Mmbo lwakutereva kuluniinge mumu lwiire urukeny lwafo sheende kwakwa.”

²⁰ Lyo mangyi Sihoni nnyalevairikya-fo, lyo Sihoni kasang'irya vandu vakwe woose kulya Yahasa naambo vakabane na Israeli.

²¹ Nndumi Iruva, Iruva wa Israeli kavika mangyi Sihoni na vandu vakwe maakony a Israeli vakavakaba, nawo Vaisraeli vakatira uruka lwa Vaamori.

²² Vakatira uruka elo lwa Vaamori loose uka Arnon fika Yaboki na kasa eko fika Yordan.

²³ Naasany Nndumi Iruva, Iruva yeto wa Israeli mmbo asoka Vaamori uruka elo vare valalollyo mbee ya Israeli. A yewe mmbo kukunndye ivakaya?

²⁴ A yekyo iruva lyafo lya Kemoshi lyilekuniinga mmbo kilakufye? Neese ekyo Nndumi Iruva wa Israeli ammulemaa nooke mbee yeeru mmbwe yeto lushenshillyaa,

²⁵ A ndesa yewe mmbo kukee nsha ngota Balaki mwana wa Sipori yeto wa Moabu? A we aleidimany isalala mbee ya Israeli neekabana nawo?

²⁶ A nki kyeema mulaidimi isoka Vaisraeli miri ya Aroeri na Arnoni na Heshboni nafo mmbo valekaafo ando a myaaka mayana araru?

²⁷ Lyo yeny nshalekutannya ukasha-fo, ni yewe kukeeshitannya kya kiila elyi kwakunda ikabana neeny. Nawe Nndumi Iruva yeto akee Mwiileta kya dede nave mwiirummbwa kya Israeli na Vaamoni inu.

²⁸ Lyo we mangyi ya Vaamoni nalaite marero a nrumi yeyo Yefta alenrummya.

²⁹ Naasa Mumuyo wa Nndumi Iruva ukasheya Yefta nawe keera efo urukeny lwa Gileadi na lwa Manase na Mispa ya Gileadi, na Mispa ya Gileadi kandekooya Vaamoni.

³⁰ Naasa Yefta kavikya Nndumi Iruva kyaasa, kaammba,

³¹ Nndumi Iruva kwakooya kushevikaa Vaamoni maakony akwa elyo shivingaa, ekyo kishuukaa efo kyeny kwakwa isheshaammbya elyi shammbona urilalyi, ekyo mmbo nshekyuutaa kive kiraso kwa Nndumi Iruva kyeekora na muro.

³² Naasa llyo Yefta aleruuka kalatya Vaamoni nandekabana nawo, nawe Nndumi Iruva kavavika maakony akwe.

³³ Kavakaba abookya Aroeri fika Miniti, miri makumi avi myoose na fika Abel-keramim, vakafwa vandu veengyi. Niindo Vaamoni valevingwa ni Vaisraeli.

Mmfu wa Yefta

³⁴ Veekimaa ivinga Yefta kawuya na kyeny kwakwe efo Mispa na mwana wakwe wa kyika kashemwaammbya. Kakaba ngoma neefina mbasa, nawe Yefta nneetiri ungyi-fo, nta wa kyuumi ao wa kyika-fo.

³⁵ Yefta eekilollya indo kasokyo mfyoova nnu, kaammba, “Woshiny lwakwa, mmwanakwa mmbo kwashirovya nnu, kwaveva umwi wa yewo veeshivavisa. Na kimmba shilevikya Nndumi Iruva kyaasa shilashidimaa ikifisha.”

³⁶ Mwana yeto wakwe kammbia, “Ndeyaakwa, kwakooya yewe kulevikya Nndumi Iruva kyaasa, naasa inutyany yefyo kulemmbia, kimmba Nndumi Iruva alekweekkya itaiya vakiduva vafo, Vaamoni yewo.”

³⁷ Naasa kavia ndeeye, “Naasa shitannya indi, shira shikudeesye ando a miiri ivii shikee kyaanya kyakwa, shindeiya efo mafumbuu na vengyi elyi shilandealyikwa nta.”

³⁸ Nawe kammbia, “Kyasia endaany-te.” Nawe karawa kwaasha ando a miiri ivii, kakaa-fo na wooroye, kakapya-fo kiiyo.

³⁹ Miiri ivii yiikyisya kawuya kwa ndeye nawe kantannya shaasa emmbikya Iruva kyaasa. Nawe mmbo ekee mwana kulore ensanga na nndu nndumi nta.

⁴⁰ Naasa efo Israeli wo mwaaka kyikava kindo kya miishivye ikummbwa mwana wa Yefta wa ufyari lwa Gileadi ando a mikonu yiina.