Vafilipi 2 - BIBILLYA Mareiyo Meele a Iruva

Ikunyiisa lya Kristo na Itumbe lyakwe

¹ Kyasia kwakooya kyiiyo iviryo muu kwi Kristo ao ikaariswa lya ngata shoose lya ikunda, na kwakooya kwiiyo yaakaniswa Mmumuyo na kwakooya kwiiyo isaryo na ilyillyo,

² ishuryeny ifura lyakwa, naambo muve va nrwe umwi nsi, na ikunda lyimwi, na nrima umwi, mwikusaraa kimwi.

³ Mulasheetana kindo kyoose mwiivakyanaa nta mwikung'anisaa-fo, kyaindi taniny fyoose mwikunyiisye, wo nndu nalollye yeto ungyi sheelyi mmbo akee ng'waana ngota we muni.

⁴ Kulave nndu ava mwiisara mbony takwe muni, kyaindi wo umwi waany nave mwiikusara kya yeekya vengyi.

⁵ Veny na nrima wa ngata yeyo sheni shasa yekee nnang'ani ya Kristo Yesu,

⁶ mashika we muni llya kipooka mmbo ekee na ngata ya Iruva, lyo we nnyalelollya iva wa ngata ya Iruva nkindo kyeekutira nakyo-fo;

⁷ llyo we muni mmbo aleva sheelyi nalatiri itumbe, kava sha ishinga, karaa ngata ya nndu wa vandu;

⁸ lyingyi-se llya alelollyo mmbo atiri fwana ya nndu wa vandu, mmbo alekunyiisa we muni katira wiindi kutani akooya ufu, yee, ufu lwa alya nsalabeny.

⁹ Naasa Iruva kanng'anisa nnu, kansimba irina lyiilanyi marina moose;

¹⁰ naambo wo nndu nashefiirya irina lya Yesu ndi, va iruvee-u na va ya ulaniny, na va efo si ya ulana.

¹¹ Na wo ulumi lwaambe paa sheelyi YESU KRISTO NI NNDUMI, naambo Iruva Nde naute-u ing'aniswa.

Sa ya ulana

¹² Kyasiany vakunde vakwa, shaasa muletira wiindi mikonu myoose, nta nshi kyeeri kilya shekee neeni-da-fo, kyaindi kive indo mmwasi elyi shilaiyo, moore ukiro lwany yeni muveni mwiitirwa ni usau na irerema.

¹³ Mashika ni Iruva akeerunda mashora nnang'ani yaany, ikunda lyany na irunda lyany, mushiinutyaa mesha yoo akundye.

¹⁴ Rundeny findo fyoose kulaifo nkunung'unu ao ivakyana,

¹⁵ naambo mukooye iva vana vesha va Iruva valatiri mbese, nta ulembi, mulatiri nta ntambo yaa irikeny elyi lyikee ilyang'a lyikeenda mwiiri, neeni elyi mukee nnang'ani yaawo mmbo mulollyo sha sa niini ya ulaniny yelu,

¹⁶ muvetira irero lya muu; naambo shiidimi iwona nrima wa ifura elyi nkonu wa Kristo ufikaa, kyoore sheelyi nshilekutakura ruu-fo, nta nshilekwaarisa ruu-fo.

¹⁷ Ee, naakwa shaaluwa kiraso kyeepusuwa kimaruma kya kyikusiryo kyany, mmbo shitirwa ni nsia; neeny shitirwa ni nsia ando amwi neeni moose.

¹⁸ Neeni kevefureny indo, muvefura ando amwi neeny.

Timoteo na Epafradito

¹⁹ Kyaindi shivikye nsia Nndumi Yesu ashiidimisyaa shirumi Timoteo nashe kwany fyeeri fya kufii, naambo neeny shiviiryo muu, elyi shimanyaa mbony tany.

²⁰ Kimmba shilatiri nndu ungyi akee kindo kyimwi neeny, ashiidimaa imanya deny mbony tany shaasa tikai.

²¹ Mashika vandu vengyi mmbo vakeeruuya mbony tawo veni, na nshi mbony ta Kristo Yesu-fo.

²² Lyo mwiishi nnduma wa Timoteo sheelyi mmbo alerundya Nrumi ya Nsia ando amwi neeny, kava sha mwana neeny sha ndeye.

²³ Naasany mmbo nshenrumaa uviny, shammeemanya efyo fikaa fishikooye.

²⁴ Neeny shikusirye sheelyi Nndumi ashiidimisyaa naakwa nnyeny isha uviny.

²⁵ Lyo shavelollya kuti iruma Epafradito kwany, akee mwanama wakwa, avekee mwaakana mashora ando amwi neeny, nsikari uroyaakwa, nawe ni nrumi waany na mwifurukannya filya fishitinnyi.

²⁶ Mashika mmbo eelangye imulollya yeni moose, karovyo deny, mashika elyi muleeta sheelyi mmbo elwee.

²⁷ Mashika mmbo elwee nnu deny, kufii nafwe, lyo Iruva kallyillya, nta nshi we muni-da-fo, neeny-da, nta nshikundye iting'wa nnu shifuluye-fo.

²⁸ Naasany mmbo shikee ikutakura nnu inruma, naambo elyi mushellolla lyingyi mufure, neeny ting'wa yakwa yaangwe.

²⁹ Mmbwaryeny na ifura kimaruma kya Nndumi, nndu sha yeu mulollye ni nndu asumani iindyo.

³⁰ Mmbo alefikya kufii ifwa kimaruma kya ishora lya Kristo, naambo tupu nainutye filya fyeyaanguye efo utaraminy lwany kwakwa.