Usukuyony 5 - BIBILLYA Mareiyo Meele a Iruva

Kyitabu na Ngurana ya Iruva

¹ Naasa shalollya efo wokony usha lwa yeto akee rembo uwe ya kitima kilya kya itumbe kyitabu kyikee kyireiye mmba na efo kwa numa, kyikee kikape muuri mfungare.

² Shalollya nsu atiri finya deny, evambisaa irero na unyanga uniini nnu, eshambaa, “Ni vi yeto asumani itarammbwa kyitabu ekyo na ifisha muuri eyo ya vayo?”

³ Nta nkulakaa-fo nndu iruveu, nta kunu ulaniny, nta efo si ya vayo, aleidima irua kyitabu ekyo-fo, nta ikilla-fo.

⁴ Na yeny shafua nnu elyi kulewiika nndu asumani irua kyitabu ekyo nta ikilla.

⁵ Naasa umwi wa vamiku valya kashivia, kulafwe-fo, lola-te, kwiifo Miiso ya ufyari lwa Yuda, wa Isindeny lya Davidi, we mmbo alevinga kutani aidima irua kyitabu kilya, na muuri ya vayo mfungare.

⁶ Shalollya yoo nnang'ani ya kitima kilya kya itumbe na valya vatiri muu vaana, na yoo nnang'ani ya vamiku valya, Ngurana ya Iruva esalalyi-u, akee sheelyi akee nshishe, atiri mbembe mfungare na miso mfungare na yeto nto Mimuyo mfungare ya Iruva yeyo ilerumwa ulaniny koose.

⁷ Kasha, keepoo kyitabu kilya na woko lwakwe usha, mmbwe yeto akee rembo yoo kitiminy kilya kya itumbe.

⁸ Kyeeri aleipoo kyitabu kilya, valya vatiri muu vaana na vamiku valya makumi avii na vaana vakawa si yoo mbee ya Ngurana ya Iruva, wo umwi waawo etiri kivale, na fipete fya saabu fiishwe mafura afwaamaa, nafyo mfyo fiterewo fya veele.

⁹ Nawo vakeemba kiimbo veshaambaa, “Nnyewe kusumani irua kyitabu ekyo na iporommwa muuri ya vayo, mashika elyi kuleshishwa, kwaurya Iruva vandu va wo isanga na wa kishomu na wo mmba, kwawoora na samu yafo.

¹⁰ Kwavaallwa vana va umangyi na vakohani va Iruva weeru; nawo mmbo vakee ishillya kunu urukeny.”

¹¹ Shalollya na iita ngyunyanga ta vasu veengyi taari toose ta kitima kilya kya itumbe, na ta valya vatiri muu, na ta vamiku valya, na yeekyena lyawo lyefikye fiku ka fiku ka mafiku.

¹² Vakarera na unyanga uniini vakaamba, ni Ngurana ya Iruva yeyo ileshishwa isumani iwarya wiidimi na usuri na urango na finya na wiindi na uniini na mbora.

¹³ Na wo kyuumbe ekyo kyikee iruveu na yaa ulaniny na efo si ya uruka na uwe ya yeeve, na efyo fyoose fiifo, shafiita fishaambaa, “Mbora na wiindi na usuri na wiidimi mfya yeto akee rembo uwe ya kitima kya itumbe, na Ngurana ya Iruva, llung'anu na llung'anu.”

¹⁴ Na valya vatiri muu vaana vakaamba, “Amen.” Na vamiku valya vakawa si, vakafiirya ndi.