Usukuyony 16 - BIBILLYA Mareiyo Meele a Iruva

Ndeeva wa Nyashi ya Iruva

¹ Shaita unyanga uniini luuka efo mmba ya Iruva, lwiviaa vasu valya mfungare, “Endeny mukandepusuya fipete filya mfungare firye unyafi lwa Iruva efo ulaniny.”

² Yeto wa mbee keenda kapusuya kipete kyakwe ulaniny, kukasha yuure ikasha, iroo, lyikatira vandu valya vatiri wende lwa ifisi llya, na yewo veindya ifwanu lya vayo.

³ Na yeto wa kavii kapusuya kipete kyakwe efo yeeveny, kukava-fo samu sha samu ya nying'a, na findo fyoose fyetiri mumuyo wa muu fikafwa.

⁴ Na yeto wa kararu kapusuya kibete kyakwe efo mireny na ngyusokeny ta mura, tikava samu.

⁵ Naasa sheeta nnsu yeto wa mura eshambaa, “Ni yewe muni usumanu, yewe kuiyo na kweefo, Mweele, mashika elyi kwarummbwa indi.

⁶ Mashika elyi valepusua samu ya vandu veele na ya vakisuku, na yewe kwavaniinga samu vani, nkyo kivasumanyi.”

⁷ Sheeta kiraso ekyo kyeerasya kishambaa, “Ee, Nndumi muni finya toose, Mirumbuye yafo ni ya dede na ya usumanu.”

⁸ Na yeto wa kaana kaletya kipete kyakwe efo nkyeerony, nato ukakora vandu na muro wa vayo.

⁹ Vandu vakaya iya iniini, nawo vakaarara irina lya Iruva yeto atiri wiidimi na ngapo yeto, nawo nta valakurye nta inninga nnduma.

¹⁰ Na yeto wa karaanu kapusuya kipete kilya kyakwe yoo kitiminy kya uniini kya ifisi llya. Umangyi lwakwe lukasheyo ni ireema vakarafuna ngyulumi tawo kimaruma kya ivavyo.

¹¹ Vakaarara Iruva wa iruveu kimaruma kyeevavio, na kimaruma kya moore awo, nta mmbalekurya kya mashora awo-fo.

¹² Na yeto wa karindaru kapusuya kipete kyakwe kulya mureny ulya nniini uvaangwaa Frati; mura wa vayo ukoomya, naambo kukee shia ya yeende vamangyi vauke taari ya ngaminy.

¹³ Shalollya mimuyo iraru mitefusu ivakye filwa, fishukaa kaniny ka shoka ilya, na kaniny ka ifisi lyilya, na kaniny ka nkisuku ulya wa wongo.

¹⁴ Yeto nto mimuyo ya vambishwa, veetana ngyende tikee indya vamangyi woose wa ulana, na ivasanyirya kya fira ya nkonu ulya wa Iruva muni finya toose.

¹⁵ (Lola, mmbo nshaa sha inyinyi. Ngoma yeto mwiilala shoovi, na ikallya soori takwe, naleende ruu na yoora sony takwe.)

¹⁶ Vakavasanyirya vakafika ando avangwaa kwa Kiebrania, Har-magedoni.

¹⁷ Na yeto wa mfungare kapusuuya kipete kyakwe efo ngyinii-u. Unyanga uniini lukauka efo mmba ya Iruva, alya kitiminy kya itumbe, lwishambaa, “Kyammaa iva.”

¹⁸ Kikasha kimwii na iruruma na kidinasi kiniini, kulore uka elyo vandu valekaa-fo kilellollyo kyingyi sha ekyo, shaasa kidinasi ekyo kyeng'ani.

¹⁹ Na muri yeto nniini ukakwaava kararu. Na miri ya masanga ikawa. Nato muri yeto nniini wa Babilony ukakumbuwa mbee ya Iruva, iniingwa upata lulya lwa unyafi lwakwe.

²⁰ Naasa wo kyuuruka kikarisha, nta mafumbu a vayo nalakilollyo-se.

²¹ Na mmbwa ya masaawe, niini nnu, ya masaawe maroo nnu, kyikava kyiroo kyuumu. Ikasha yuuka iruveu ikasheya vandu. Vandu vakaarara Iruva kimaruma kya mmbwa ilya ya masaawe; mashika elyi ngapo yeyo yekee niini nnu.