SEKARIA 9 - BIBILLYA Mareiyo Meele a Iruva

Mirumbuye ya Myaandu ya Masanga afiitani

¹ Ekyo Nndumi Iruva aamba; Nndumi Iruva nshi-alerera kya uruka lwa Hadraki nsi-fo, naakwaa, ni Damasko. Naakwaa ni uruka lwa Aramu, ni masaa a Nndumi Iruva, kyimwi sha ngyufyari ta Israeli shoose.

² Niindo-da na muri wa Hamati, eto ufiitani na Hadraki; naakwa ni miri ya Tiro na Sidoni; lla neefo vatiri urango wiingyi.

³ Muri wa Tiro mmbo utannyi turuve itiri finya, ukaumbya fesa sha kiluulyi, na saabu sha mando efo shia.

⁴ Nndumi mmbo ansokaa umasi lwakwe loose, usimba lwakwe loose atiri andelweera yeeveny, neemamita muri yeto na muro.

⁵ Muri wa Askloni mmbo valollya na yeereya. Nato muri wa Gaza ushekwaala-laa neevavywa mmuu, na Ekroni kiwo-da, mashika kilya veevikye nsia vansokwa. Muri wa Gaza mmbo usheretaa mangyi yaawo, nato Ashikeloni mmbushekaywa mmbandu-fo.

⁶ Muri wa Ashdodi mmbo ushekaywaa mmashetara, na umbafu lwa Filistia ushelumanya furu.

⁷ Shiveeme ilya nyama itiri samu, na shoonga shitefusu, Misaaro isheva masaa akwa, kimwi sha ufyari lumwi efo Yuda. Vandu va Ekroni vasheva sha Vayebusi.

⁸ Yeny shimuni mmbo nsheringaa uruka lwakwa, Shisheringa matorito alakillye-fo, Nkukyiifo-se nndu ashepaana vandu vakwa-fo, mashika na miso akwa shimuni, mmbo shilelollya ngata valyiiye ukiva.

Mangyi eto asheshaa

⁹ Kapeny kilewa eni vandu va Sioni! Kapeny kyoorongye eni vandu va Yerusalemu! Loleny mangyi yaany akee musheya, mmbo akeesha amma ivinga neefura iniini, eekunnyise, eesamye nshungu, ngashe ya nshungu, na mwana wa nshungu.

¹⁰ Mmbo ashemamitaa mitika ya fira, urukeny lwa Efraim, na frasi ta fira, tuuka muri wa Yeusalemu; ngyura ta fira tishefishwa kwaasha. Nawe asheende urilalyi nnang'ani a masanga. Umangyi lwakwe lushekwaana uka yeeve kundefika yeeve, kupookya mura wa Eufrate fika masiiyony a ulana.

Vandu va Iruva valekevywa

¹¹ Nndumi Iruva mmbo aamba indi: Kyimaruma kya samu ya kyaasa kyakwa na yeni, mmbo nshelekeiya vandu vany ewo vakeevafingye kiroriny kilatiri mura.

¹² Eni vafungwa mutiri yiirikyo wuyeny efo turuveny yaany. Naambo yeny shimoongoyeny: Mmbo nshemutannya mesha ka-makamba avii.

¹³ Mashika mmbo shallema Yuda sha ura lwakwa, na Efraim shamwallwa mife yakwa, mmbo nshallwa vandu va Sioni sha usu, lweemamanya vandu va kiriki, nawo vave sha usu lwa nndu shaamba.

¹⁴ Nawe Nndumi Iruva ashesomukyaa vandu vakwe; ashelekeiyaa mife yakwe sha kimwii, Nndumi Iruva ashekapaa iranda, mmbo asheshaa aryani na kitita-si kya taari ya sinde.

¹⁵ Nndumi Iruva muni matorito mmbo asheringaa vandu vakwe, nawo vasherumata vakiduva vawo. Vashekapaa kyoorongye fireny sha vanangwa vashepuswa samu ya vakiduva vawo. Ishepusuka sha samu ya kiraso Yalettywa kitareny kyeerasya yuuka nndeeveny.

¹⁶ Kyeeri ekyo Nndumi Iruva waawo muni mmbwe ashevaturunyaa, mashika wo ni vandu va ironda lyakwe. nawo mmbo vashemikaa efo urukeny lwakwe, sha mawe a wuuru uniini efo uretony

¹⁷ Yee! Mmbo kivaa kisha na isennya nnu, mashika vakoo va kyuumi na va-kyika mmbo valyaa, neena vatire finya nnu.