SEKARIA 8 - BIBILLYA Mareiyo Meele a Iruva

Yerusalemu shiyya

¹ Irero lya Nndumi Iruva muni matorito lyikasha kwakwa lyishaamba ule,

² Nndumi Iruva muni matorito, mmbo aamba ule; Nrima wakwa mmbo ulangye yeekya Sioni kyimaruma kya ikunda lya vandu vakwa. Na lyingyi mmbo shitirwa nnyashi ing'ani kimaruma kya vakiduva vandu vakwa Sioni. Ni yeny Nndumi Iruva muni matorito shaamba.

³ Yeny mmbo shiwuya muriny wa Sioni shishevikaa marembo akwa yoo Yerusalemu nnang'ani. Yerusalemu mmbo ushevaangwa muri wa usumanu, na ifumbuu lyakwa yeny Nndumi Iruva muni matorito, mmbo ushevaangwa ifumbu Yeele.

⁴ Yeny Nndumi Iruva muni matorito, mmbo shaamba; Vandu vakuu, vomi na vaka, mmbo vashelollywa veeke rembo efo mbaa-mbaa ya shia ta Yerusalemu, wo umwi na nsengye wakwe weekusibira kimaruma kya muu mwaasha.

⁵ Shia shoose ta muri wa Yerusalemu, tishelollywa tishwe-fo vana va kyika na va kyuumi veekukyelaa efo shia. Ni Nndumi Iruva muni matorito aamba.

⁶ Yeny Nndumi Iruva muni matorito, kwa vandu eva vasaae-fo, mikonu yei, ni kindo kilashiidimikaa. Indi yeni mmbo mukusarie ni kindo kilashiidimikaa kwakwa yeny Nndumi Iruva muni matorito?

⁷ Ni yeny Nndumi Iruva muni matorito shaamba, “Mmbo shishekira vandu vakwa wooka urukeny lwa taari ya ngama, na wooka urukeny lwa taari ya nkwaany.

⁸ Nawo shishevavika yoo Yerusalemu nnang'ani, vasheva vandu vakwa, na yeny shisheva Iruva waawo, wa kikusiryo na wa usumanu.”

⁹ Nndumi Iruva muni matorito mmbo aamba: “Kaarye-ny! Yeni vandu, elyi mwiifo mwushiita mbony tuuka kaniny ka vakisuku, kupookya nkonu ulya nsuka wa mmba ya Nndumi Iruva muni matorito weveywa, naambo ikooye itanwa wiiya.

¹⁰ Mashika yefo kwambee, vandu nta mafisi mmbekeeniingwa weesi-fo, nta nkweifo wiitanu nnang'ani ya nndu na nndu-fo, mashika shemeengye vandu usumanu vakasakya wo veni na veni.

¹¹ Indi vandu vasaaye-fo ulaalu nshishevatannya sha valya va mikonu ileera-fo, ni Nndumi Iruva muni matorito aamba.

¹² Ulaalu, mmbo kushevaa-fo urilalyi urukeny, sabibu mmbo tishevikaa ndunda ta-vayo, na sumbai isheende shoonga, na mmbwa ta mwiina tuuka iruveeu, vandu vashesaa-fo mmbo nshevaniinga findo efyi fyoose five fyawo.

¹³ Naasa yeni vandu va Yuda, na vandu va Israeli, kyeeri kileira mmbo mwelollywa sha vandu vadenge nnang'ani ya vandu va masanga, indi ulaalu mmbo nshemukiraa neemuvikya mbora. Kaarieny! Mulaereye-fo.”

¹⁴ Nndumi Iruva muni matorito mmbo aamba: “Ndesa llya sheekunndye imweengye ngapo kyeeri kilya vamiku vany, veshiteere shanyafu-kwa, nta shilaalashike tara.

¹⁵ Kweekyo mmbo shanrummbwa shila itana mesha kwa muriny mbwa Yerusalemu na mmba ya Yuda, kulaereye-fo.

¹⁶ Efyi mfyo findo mushetanaa, wo umwi navie ungyi ekyo kikee kya dede. Efo makwaanuny any a irummbwa myaandu, muutye vandu fya usumanu na urilalyi.

¹⁷ Kulave-fo nndu nnang'ani yaany akusara itannya mwanamaye kindo kikasha, nta imfingya kindo kya wongo, mashika findo efyi fyoose mmbo shifisuuye, ni Nndumi Iruva aamba.”

¹⁸ Nalyo irero lya Nndumi Iruva lyikasha kwakwa, lyikaamba:

¹⁹ Nndumi Iruva muni matorito mmbo aamba; Ikootoya lya mwiiri wa kaana, wa karaanu wa mfungare, na lya mwiiri wa ikumi mmbo ishevaa yefo mmba ta vandu va Yuda, ni sukukuu mikonu ya ifura miniini, kweekyo kuve-fo ukundi, udede na urilalyi.

²⁰ Nndumi Iruva muni matorito mmbo aamba indi: Vandu veengyi va masanga engyi vasheshaa na vengyi wooka miriny ya kwaasha.

²¹ Vandu va muri umwi, mmbo vashesengetyaa muri ungyi vaambe, Lwaangusye uviny lweende loose, lundetereva mbora kwa Nndumi Iruva muni matorito.

²² Na yeny shimuni nsheendaa, na vandu veengyi na masanga atiri finya mmbo vashaa iruuya Nndumi Iruva muni matorito kunu Yerusalemu naambo vawonise mbora ya Nndumi Iruva.

²³ Ni Nndumi Iruva muni matorito aamba; Kyeeri ekyo, vandu ikumi wooka masangeny a fishomu fya wo ngata mmbo vashenanavya ikendu lya soori ya Myuda, veeshaamba, ndifony lweende loose, mashika mmbo lwiitye sheelyi Iruva mmbo akee kyaalu kyany.