SEKARIA 7 - BIBILLYA Mareiyo Meele a Iruva

Kindo Nndumi Iruva aamba kyekootoya

¹ Kwikee mwaaka wa kaana wa mangyi Dario irero lya Nndumi Iruva lyikasheya Sekaria nkonu wa kaana wa mwiiri wa kyeenda nto Kislefu.

² Vandu va muri wa Beteli mmbo veruma Sharesa na Regem-meleki amwi na vandu vawo veende itereva ulyilyi kwa Nndumi Iruva.

³ Naambo vandevesa, vakohani na vakisuku va Nndumi Iruva muni matorito; A-ndesa lukeengera ikootoya na ifiirra kunu mwiiri wa karaanu ndesa lulemmishivia itana ando a myaaka miingyi ilemmiira?

⁴ Naasa irero lya Nndumi Iruva muni matorito, lyikashisheya lyikaamba;

⁵ Via vandu woose va urukeny elu, na vakohani kyeeri mwefinga, nekootoya mwiiri wa karaanu na wa mfungare, mmbo mwefinga kimaruma kyakwa?

⁶ Na kyeeri mwekeelya na ina, nshi mweekeelya na ina kimaruma kyany muveni?

⁷ A kyeeri muri wa Yerusalemu weekemmbikye mbora amwi na vandu vawo, neewo woose veefitani nawo, nshemurikya nrumi ya kana ka vakisuku vakwa va kyeeri ekyo?

Kiila Kyateveta Ushinga

⁸ Irero lya Nndumi Iruva lyikashisheya yeny Sekaria lyikaamba;

⁹ Yeny Nndumi Iruva muni matorito mmbo shaamba, Rumbweny mirumbuye ya usumanu, wo nndu nalyillye ungyi.

¹⁰ Kulave-fo nndu awonnya nka wa ding'u, nta mwana wa ngwera, nta nndu mwiny, ao nndu nturi alatiri kindo, kulave-fo nndu atirya mwanamaye nkuushu efo nriminy.

¹¹ Indi vandu vakalema ishaarannya, vakava na nrima muumu, na maarwi awo vakavika-fo kisooro valakunde yiita.

¹² Vakaallwa miirima yaawo ikava myuumu sha mawe, naambo valakooye yiita ivavaso lyakwa, yeny Nndumi Iruva muni matorito shilelyiruma kwany, mumuyo wakwa, na kana ka vakisuku wakwa valya va mbee. Kwekyo yeny Nndumi Iruva muni matorito shanyafukwa nnu kyimaruma kyawo.

¹³ Mashika llya shilevavaanga, mmbalekunda yiita-fo, kweekyo kyeeri neeny valeshivaanga, nshilekunda yiita-fo.” Ni yeny Nndumi Iruva muni matorito shaamba.

¹⁴ Kya indi mmbo shivanyanyata na uraato lwa kitita-si nnang'ani a masanga valaveeshi. Na uruka llwa valelura-u lukasaa-u lulatiri vandu, kulave-fo nndu mwikaa-fo, na uruka elo usha indo lukasaa-fo lulatiri vandu.