SEKARIA 5 - BIBILLYA Mareiyo Meele a Iruva

Usukukkyo lwa kyitabu kyikeerumbuka uwe

¹ Naasa shalola-se lyingyi shalollya kirami kitiri mareiyo kikeerumbuka!

² Nawe kashivia, “Nkyokyi kulollye?” Neeny sharouwa mmbo shilollye kirami kitiri mareiyo kikeerumbuka uwe. Waasha lwa-vayo mita kyeenda, na ivari mita yiinya na kyenga.

³ Nalyo kashirouwa kashivia, kunu kyitabuny ekyi kyo kidengo kikeeshe-woya, ulana loose. Taari imwi mmbo kyikeekyireiye sheelyi manyiny moose mmbo ashaantwa kunu urukeny elu. Na taari eyo ya kavii mmbo kyikeekyireiye sheelyi nndu mwiilya mboo, mmbo ashetannyo ekyo kyeni.

⁴ Nndumi Iruva muni matorito mmbo aamba “Mmbwe muni asherumaa kidengo ekyo, na woko lwakwe muni, nakyo mmbo kishedosha wo mmba ya nndu inyinyi, na nndu mwiilya mboo kyikee kya wongo, na irina lya Nndumi, mmbo mmba eyo ishemamikaa na mboshiki tavayo, amwi na mawe fishelyiwa fisye pyu.”

Usukukkyo lwa Nka akee kikabuny

⁵ Lyoony nsu ulya alerera neeny kashisheya kashivia, “Ipoo miso kwalola kindo kilya kikeesha kulya!”

⁶ Neeny shammbesa, “A nkyokyi ndesa?” Nawe kashirouwa, “Ulya nyinkusha urye ulyamari lwa ulana loose.”

⁷ Nato nkusha ulya mmbo wetiri mfiniko ukeensongosye na arera; mfiniko ukootwa-u, kulya nkusheny mbullya shalollya-fo nka eefo rembo.

⁸ Nsu ulya kashivia, “Nka yeto mmbo asha ando a ulyamari.” Naasa nsu ulya kakunnya nka ulya efo nkusheny ulya kaviirya-u nfiniko.

⁹ Neeny sheepo miso, shalollya vaka vavii veeshaa na kulya nkai! Kweifo uraato efo maaruny awo atiri finya, avakye a imutony, nawo vakeepo nkusha ulya uka sumbai kutani vaufita uwe nginii-u.

¹⁰ Naasa shavesa nsu ulya alerera neeny shambia, “Nkwi vakeerwa nafo nkusha ulya ndesa?”

¹¹ Kashirouwa, “Ni kulya urukeny lwa Babilony na kulya vandeutannya-fo mmba yayiinndya; nayo ikammisya vandeuvika efo mmba eyo valyiinndye.”