SEKARIA 4 - BIBILLYA Mareiyo Meele a Iruva

Usukukkyo lwa Uroro lwayeekyerya taa

¹ Naasa nsu ulya erera neeny kashisheya lyingyi itorito lya kavii, kashaanta sha nndu aantwa alele-rony.

² Naasa kashivesa, “Nkyoki kulollye?” Na yeny shamba, “Mmbo shilollye uroro lwa ta lwa saabu yele, amwi na nndeeva ukeemweekere uwe ya-vayo, na ta tavayo mfungare na wo imwi nyivore upiti lwa iletya mafura.

³ Nang'u kweiyo miri ivii ya miseituni umwi taari ya woko usha, na ungyi taari ya woko umuso lwa nndeeva.”

⁴ Naasa sharouwa nsu ulya alerera neeny shambesa, “Ale Nndumi vakwa; findo efi mfyoki ndesa?”

⁵ Nawe nsu ulya alerera neeny kashirouwa kashivia, “Nkyo nkwiishi findo efyi nkyokyi?” Neeny shaamba, “Oode,” Nndumi wakwa.

Kyaasa kya Iruva Kwa Serubabeli

⁶ Naasa, kashivia, “Elyi ni irero lya Nndumi Iruva alerikya Serubabeli, kammbya nkushiidima ivinga kwa finya nta ivinga kwa wiidimi-fo, indi Mumuyo wakwa mweele. Ni Nndumi Iruva muni matorito aamba.

⁷ A mmbi yewe ifumbu inniini, (ng'ana na kwang'ana sheekyi,) Serubabeli mmbo ashekwaalaala sha uvasha ando kweetana mmba ya iterevya, neelyi kushefikya iwe lya mafurumyony, mmbo vandu vashekapa nndoro veerumishaa Iruva.”

⁸ Lyikashisheya-se irero lya Nndumi Iruva lyikaamba;

⁹ “Maako a Serubabeli, mmbo atannyi nsuka wa mmba yei, nawe mmbwe asheimarisyaa. Llyo meendi mumanyaa sheelyi Nndumi Iruva mmbwe aleshiruma kwany.

¹⁰ Valya woose valeipala mashora a Serubabeli; mmbo vashefuraa kyeeri vashelollyaa mashora a maako akwe. Yaa mfungare ni miso a Nndumi Iruva yoo akwaani ulaniny koose.”

¹¹ Naasa neeny shammbesa, “Miri yei ivii, ya miseituni, nnyeki yei ikee taari ya woko usha na woko umuso lwa uroro lwa yeekyerya taa?”

¹² Lya kavii, shammbesa, “Maramba yaa avii a miri yei ya miseituni ikee taari ya woko usha na umuso lwa uroro lwa ta ya saabu yele teeleta mafura nteekyi?”

¹³ Kashirouwa kaamba, “Nkyo nkwiishi findo efyi mfyokyi?” Neeny shaamba, “Oode nndumi wakwa.”

¹⁴ Llyoony kashivia, eva mmbalya vavii vakee vaambe mafura, naambo vakooye irunndya Nndumi.