SEKARIA 13 - BIBILLYA Mareiyo Meele a Iruva

¹ Nkonu yeto usheshaa, mmbo kushevaa-fo usoka lweesangya na yiilyisa ulyamari na utefusu loose llwa mmba ya Davidi, na valya vakee Yerusalemu.

² Na nkonu yeto Nndumi Iruva muni matorito aamba; mmbo nshesangyaa-fo mafwanu na maruva a wongo moose kunu urukeny, nalakaa nakumbuwo lyingyi, sanda na vakisuku, amwi na mimuyo mitefusu myoose.

³ Kwakooya akwiipo-fo nndu lyingyi sha nkisuku, ndeeye na maaye yewo vammbonnye, mmbo vammbya ule, yewe nkukaa na muu-fo, mashika yeni mmbo mwaawuya ukisuku lwa wongo kwa irina lya Nndumi Iruva, nawo ndeeye na maaye ni kuti vammbwae kwakooya aawuya kisuku.

⁴ Naasa kupookya nkonu yeto, wo nkisuku mmbo asheereyaa, neesuka, nnakyikaryaa yaamba mbony ta ukisuku lwakwe, nta iraa soori ta ukisuku naambo nalakooye ilemba vandu-fo.

⁵ Mmbo ashaamba, yeny nshikee nkisuku-fo, mmbo shikeemwiirema sumbai ukya iwonika lyakwa, kundefika nkonu wa inu.

⁶ Neelyi asheveswaa, “A fishavere efyo fikee mungony mbwafo mmbo fyuukye-kwi?” Mmbo ashaamba, “fishavere efyi mmbo fyeshikooya kwa amurasa wakwa.”

Ishingo lyewaa Veesi va Iruva

⁷ Nndumi Iruva muni matorito, aamba: “Ipoo, usu, mamanya mwiisi wakwa, mwiisi yeu ashirunndyaa, nkape na monri anyanyake, mmbo shisheorwaa woko lwakwa shishekaba valya vafwafwa.”

⁸ Nndumi Iruva, mmbo aamba, “fyenga fivii fya vandu urukeny koose mmbo vashemamitwaa na kyenga kyimwi kyisherewa-fo na muu.

⁹ Kyenga ekyi kyimwi mmbo nshekivikaa murony shikisangye sha nndu asangyaa fesa, shishekisisa sheelyi vandu vasisaa saabu. Nalyo vashesendaa irina lwakwa, neeny llyo nshevarouwa. Shaambe yeva ni vandu vakwa nawo vaambe, ‘Nndumi Iruva ni Iruva weeru.’”