SEKARIA 12 - BIBILLYA Mareiyo Meele a Iruva

Ukyiro lukeesha Yerusalemu

¹ Irero lya Nndumi Iruva, kwa vana wa Israeli. Nndumi Iruva, yeto atannyi iruveeu na ulana, koomba nndu ooka uteeriny kanniinga muu.

² Mmbo aamba; nsheallwa muri wa Yerusalemu usheva sha kikombe kya mfinyu, na masanga moose yoo afiitani na Yerusalemu, mmbo vashenaa vasinge-singe sha vanangwa. Kyeeri muri wa Yerusalemu ushekabwaa na miri ya Yuda myoose mmbo ishekabwaa.

³ Nkonu yeto mmbo nsheallwa muri wa Yerusalemu usheva sha iwe lya ngina kwa vandu woose. Yeto moose ashekooya ilyiipo na uwe mmbo lyishemfishaa we muni. Vandu va masanga moose mmbo vashekabaa muri yeto.

⁴ Nkonu yeto, Nndumi Iruva mmbo aamba, Mmbo nsheeresee frasi tawo, na wo mwiisaama yeto nshemweengye ukwale. Frasi ta masanga engyi mmbo shitiwaa miso, indi ufyari lwa Yuda, mmbo nshekaa kyaalu kyawo.

⁵ Llyo vasongoru va Yuda (vashivianaa), “Vandu va Yerusalemu, mmbo vaniingwa finya yuuka kwa Nndumi Iruva muni matorito, Iruva waawo.”

⁶ Nkonu yeto mmbo vashallwa vasongoru va Yuda vave sha ngyoyo ta muro nnyaasi nnang'ani ya ngorosho niini ivakye kyimwii kishaaka nnang'ani ya nganu shuumu. Mmbo vashemamitaa masanga moose yoo afiitani nawo. Indi vandu va Yerusalemu wo mmbo vashevaa kippwa efo muriny mbwawo.

⁷ Na yeny Nndumi Iruva mmbo nshetaramaa mbele vandu va mmba ya Yuda, naambo vandu va mmba ya Davidi na yewo vakee Yerusalemu, valashekulollya sheelyi mmbandu va itumbe mmwasi ya yewo va ufyari lwa Yuda.

⁸ Nkonu yeto Nndumi Iruva mmbo ashevaringa na ngao, valya va muri wa Yerusalemu, naakwa ni valya vafwafwa nnang'ani yaawo nkonu yeto mmbo vasheva na finya sha ilya ya Davidi, na va mmba ya Davidi isheva na finya ya Iruva. Sha nsu wa Nndumi Iruva asheveerya mbee.

⁹ Na nkonu yeto mmbo nsheruuya imamita masanga moose yoo ashekooya ikapa Yerusalemu.

¹⁰ Valya va mmba ya Davidi neewo vakee muriny wa Yerusalemu, mmbo nshevaniinga nrima wa ilyillya na nrima wa fiterewo valollye valya valevaafinya ngata vakee ivavywa naambo vaiiye kyimaruma kyawo sha nndu ayiiyaa mwana wakwe wa ngitany, akabe kiiyo na ivavywaa nnu sha nndu afiira kya ifiiywa ni mwana wakwe mmbee.

¹¹ Nkonu yeto mmbo kuvaa-fo kyiiyo kiniini efo muriny wa Yerusalemu; sha kyiiyo kilya kya Hadodi-ri-moni, kulya kasa kya Megido.

¹² Uruka mmbo lufiiraa. Wo ufyari mmbo lufiira kyaanya, na vaka va mmba ya Davidi, kyaanya na vaka vawo kyaanya, va mmba ya Natan kyaanya, vaka vawo kyaanya,

¹³ va mmba ya Levi kyaanya na vaka vawo kyaanya, va mmba ya Shemei kyaanya, na vaka vawo kyaanya.

¹⁴ Na va mmba tingyi shoose, tasaa-fo, mmbo vafiira vomi kyaanya na vaka vawo kyaanya.