SEKARIA 10 - BIBILLYA Mareiyo Meele a Iruva

Nndumi Iruva avika kyaasa kyeekira vandu

¹ Tereveny Nndumi Iruva yeto eende mmbwa ya mwaaka na fyeeri fya-vayo. Iruva mmbwe eende mafishi na mmbwa ikooloka, ikanisa marema na findo fyoose fikammya kwa vandu woose.

² Vandu mmbo vavesaa veelafya, na vaanga va wongo, indi firouwo vaniingwaa ni vandu yewo ni fya wongo na urung'ani. Valya vatambashwa moorya ni wongo vaamba na findo fyeereta vandu. Efyi fyoose ni vandu vakera-raa efo neefo sha maanri alatiri mwiisi. Mmbo vatirwa ni maariso, mashika elyi valatiri nndu mwiivasongoya.

³ Nndumi Iruva mmbo aamba, “Mmbo shitiri n nyashi nnu kya veesi yewo, na vasongoru vawo, mmbo nshevarikyaa ngapo, mashika Nndumi Iruva muni matorito mmbwe, mwiisa ironda lyakwe yewo va-mmba ya Yuda. Yewo mmbo vashevaa veekapana fira vakwa vakaari.

⁴ Nnang'ani yaawo mfo kundo lyishuuka ngo teesaleesa yeema, ura lweekapana fira, na veeshillya va-wo ngata mfo kundo vashuuka.

⁵ Mmbo vashevaa vandu vatiri finya shiniini ya ikapana fira; mmbo vashekakashaa vakiduva vawo sha ipwashi lya shia. Mmbo vashekapana, mashika Nndumi Iruva mmbo akee amwi nawo. Vashevatuula-si naakwa ni vesaama frasi vawo.

⁶ “Ewo va mmba ya Yuda mmbo nshevaniinga finya, neewo va mmbaya Yosefu mmbo nshevakapannya. Mmbo shivalyillyaa, shivaviire kyeny mashika ni vandu vakwa shivakunndye. Mashika yeny ni Nnduumi Iruva, Iruva muniawo, na mwiiarannya fiterewo efyo fyawo.

⁷ Vandu va Efraimu mmbo vashetiraa finya sha matorito a fira, vasheishwa nsupa sheelyi vana kyaanka, na efyo fyoose, vana vawo mmbo vashefilollyaa, na mirima yaawo mmbo ishiishwa ifura na irumisha Nndumi Iruva.

⁸ Mmbo shivaanga vandu vakwa na ivaummbya ando amwi shishevakiae, vave veengyi, na ifumbuka shallya veekai llya vekee elyo mbee.

⁹ Naakwa ni-llya shevanyanyatya yefo masangeny engyi mmbo vasheshikummbwa yeny veeke efo masangeny a kwaasha, wo amwi na vana vawo, vashewuya kwawo.

¹⁰ Mmbo nshevaviira kyeny wooka urukeny lwa Misri, nshesangirya wooka Ashuru, shisheveende urukeny lwa Giliadi na Lebanoni na vengyi vature mwaanya.

¹¹ Mmbo vashekillya Yeeve lya Misri, matundulu a vayo ashefweeriswaa na ndilyi ta mura wa nile tishea kutwaa.

¹² Shishevaallwa vandu va Nndumi Iruva vatiri finya, nawo vasheshiinndya na ishirumisha. Ni yeny Nndumi Iruva shaamba.”