SEFANIA 3 - BIBILLYA Mareiyo Meele a Iruva

Ulyamari lwa Yerusalemu

¹ Woshiny lwafo Yerusalemu. Muri eto nravi, ukava kilemi, muri ufotaa vandu va vayo.

² Mmbaleirikye Nndumi Iruva nta isara shia takwe-fo. Nta mmba kivikye Nndumi iruva nsia-fo, nta intereva ngarami-fo.

³ Vaniini vavayo mmbo vavakye miiso tidinaa. Na veerumbwa myaandu vawo vakavaka makite a ngoroshony atirwa nshaa, nalaraa-u nta iffwa kukye.

⁴ Vakisuku vawo valasaraa kindo, vakava valembi, Vakohani vawo vakatefusa findo fyeele, na mavavaso a Nndumi Iruva vakaafullwa vaambe ekyo kivasennyaa wo veni.

⁵ Kyeendi Nndumi Iruva aiyo. Mmbo atana ekyo kya usumanu kyeni. Wo nkonu mmbo eengye vandu vakwe efyo fya usumanu. Kyeendi lyo yewo varavi vakeengera itana fya uravi nta valalollyaa sony.

⁶ Nndumi Iruva mmbo aamba indi, “Shammaa-fo vandu va masanga woose. Shammamita miri yaawo shara-fo masimamba afikye-fikye. Miri mmbo ilyamarikye, ilatiri vandu.

⁷ Kimmbe indo shakusara vandu vakwa mmbo vashitirya vio neesora shia yakwa, nta vare valarekywa kilya vandu vengyi valetannywa. Llya yeni vakatana uravi uniini mwaasi.”

⁸ Nndumi Iruva aamba, “Sye irisheny mullole nkonu yeto nshederaa na vandu va masanga. Mmbo nshevaaumbya ando amwi na vamangyi vashelollya unyafi lwakwa. Ulana loose mmbo lusheyaa murony kyeendwa ni unyafi lwakwa.

⁹ “Kyeeri ekyo mmbo nshaalashaa kishomu kya vandu. Shivedimisye irera kishomu kyorokye naambo vashivaange yeny Iruva Mwaafinya, na ishiindya kwa ngoo imwi.

¹⁰ Fika na vandu vakwa vanyanyakye kwaasha na mira kulya Esopia mmbo vasheshuutyaa firaso.

¹¹ Kyeeri ekyo eni vandu vakwa nta mmushekitirwaa nsony mashika elyi muleshilyamarya-fo. Neeto moose mwikurosa akee nravi mmbo nshe-dovaa-u. Llyo neeni mulakishilyamaryaa-se alya ifumbuny lwakwa yeele.

¹² Alya mmbo nsheraa-u vandu vakunyiise, vamamiri, vashiruyaa.

¹³ Vandu yewo va Israeli vasaafo mmbashetannyaa nndu uravi-fo, nta yaamba wongo-fo, nta ilemba-fo. Mmbo vashekukayaa urilalyi, vavikyo mbora, valasheereya nta nndu.”

Kyiimbo kya Ifura

¹⁴ Imba kukoomi na ifura, ewe Israeli! Kyesa na nrima wafo moose ewe Yerusalemu!

¹⁵ Nndumi Iruva amaa yuuta-u ngapo yafo. ammuumbuta vakiduva vafo. Nndumi Iruva mangyi wa Israeli akee neewe. nta kulakyeereye-se-fo.

¹⁶ Kyeeri kiifo kishaa elyi vasheviaa Yerusalemu “Kulairyee-se, ewe Sioni. Kulaviire maako mungo.

¹⁷ Nndumi Iruva wafo akee neewe finya yakwe yakweengye ivinga. Nndumi Iruva ashefuraa neewe nashekuwonisya muu mwiiya efuraa,

¹⁸ mushefuraa sha vandu valya sukukuu.” Nndumi Iruva aamba, “Shamma yuuta-u urumato shaangata-u sony tafo.

¹⁹ Fyeeri fiifo fishaa, Nshekapa yewo veekufota Nsheauwa valemwa woose Shiviire yewo vanyanyakye kyeny. Na usutu lwawo lushealashwa luve nnduma Nang'u masanga moose nashevarumisha

²⁰ Fyeeri fiifo fisha, Vandu vafo yewo vanyanyakye vashe kyeny Nshemuniinga nnduma masangeny koose mushewuya isenywa-se. Ni Nndumi Iruva arera indo.”