SEFANIA 1 - BIBILLYA Mareiyo Meele a Iruva

¹ Irero lya Nndumi Iruva lyilesheya Sefania mwana waa Esopia, mwana wa Gedelia, mwana wa Amenia, mwana wa Esekia, kyeeri mangyi kya Yosia mwana wa Amoni

Mwaandu ukeesheya Yuda

² Nndumi Iruva, mmbo aamba, “Mmbo ushelyamaryaa ulana loose,

³ Vandu woose na findo fitiri muu fyoose, ndeye makunga. Varavi vasie woose. Nndumi Iruva, wa vandu moose, kulore akyaa-fo nndu.

⁴ Mmbo ushekapaa vandu va Yerusalamu na Yunda shoose. Na miindye myoose ya Baali, kure kulakaa-fo nndu vakohani vawo va wongo. Woose yewo veendya nkyeere nshevamamitaa, neewo va mwiiri na nyinyiri-da. Neewo veeshiindya vakalya mboo neeny, lyo vakavalya mboo na iruva lya Moleki nawo-da nkuti shivamamite

⁵ Mmbo llyamara wo umwi asamaa mmbeu na iindya mwi, mwiiri, na nyinyiri. Lyingyi-se llyamara woose ewo vallya mboo na yeny kya wongo, ate mmbo vallya mboo na irina lya iruva Moleki.

⁶ Mmbo llyamara ewo woose vashikapa mungo, nta valakishilatyaa, naakwa nyewo valashaa kwakwa vashitereva ivatetera.”

⁷ Nkonu ukee kufii kyeeri Nndumi Iruva ashekaa rembo yuutya vandu uvingo, nkyo mmalallya sau mbee yakwe. Nndumi Iruva mmbo akee idesya yuutya vandu vakwe vave kiraso kyemamitywa mmuro, mmbo ambaanga misa ishekaba Yuda.

⁸ Nkonu yeto wa ishisha Nndumi Iruva aamba, “Mmbo nshekapa fisongoru, vana va mangyi na woose yewo vakeetana findo fya ngaa ya veny.

⁹ Mmbo nkapaa woose yewo vendya varumu na yewo veva na iwaa naambo veshure mmba ta vanndumi vawo na findo fya wiivi.”

¹⁰ Nkonu yeto Nndumi Iruva aamba, “Mushiita kiiyo yo mwaangony wa Yerusalemu uvaangwaa Mwaango wa Ikunga. Mmbo mushiita kiiyo kiniini efo muriny efo kukee kwiiya na unyanga lwa ntiri nniini efo fidooro-u.

¹¹ Kyeeri mushitaa kiiyo kya wo ngata, yeni mukee taari ya kwaasi ya muri, mashika vekapa mbusha mmbo vakooya vammefwa.

¹² Kyeeri efyo fisheutika mmbo nshipoo taa shisallwe nayo efo Yerusalemu shikooye yewo vekurosa wo veni, yewo vakushopaa vakaamba, Nndumi Iruva nnyatanaa nta kindo indi ao indo-fo;

¹³ Yewo mmbo vasheookwa masaa awo na mmba tawo timamitwa. Mmbashekaa efo mmbeny yeto vakeetana-fo, nta mmbashenaa mfinyo wa misabibu vakevaaya-fo.”

¹⁴ Nkonu yeto nniini wa Nndumi Iruva nkufii ukai, kufii nnu, mmbo ukeyaangusya isha! Ni nkonu ushevavisaa; Naakwa vava matorito vatiri fisha nkonu yeto mmbo vashefwaa!

¹⁵ Ni nkonu wa fyuure wa ukiva na fyuure, nkonu weelyamarwa neemamitwa. Ni nkonu wa Ireema yuu, ifishi iroo lyirandavi.

¹⁶ Ni nkonu uringitye ni maranda a fira, na kyoorongye kya matorito va fira, vasammbwaa miri miikare na minara ya vayo.

¹⁷ Nndumi Iruva kawuya kaamba, “Mmbo nshengyee vandu va masanga urumato lwa ngata yeyo kutani wo nndu eenda eeshaasharaa sha nndu nalatiri miso. Mmbo valeshilyamarya, nalyo samu yaawo mmbo ishepusuwaa sha mura, na minying'a yaawo inyanyake efo neefo ipoye-fo.

¹⁸ Nkonu eto Nndumi Iruva asheoraa paa unyafi lwakwe, nta fesa yaawo na saabu yaawo nnyishevakiraa-fo. Ulana loose mmbo lushelyamarwaa ni unyafi lwa Nndumi Iruva, nndu moose akee ulaniny mmbo asherumatwa.”