SABURI 92 - BIBILLYA Mareiyo Meele a Iruva

Kyiimbo Kya Irumisha

¹ Ni kindo kikwaani yaana Nndumi Iruva, Na iimbya irina lyafo, ee-da, Kukee ando A uwe.

² Ivambisa usha lwafo ngama, Na usaari lwafo kyeeri kya kio

³ Kwa fiimbo fya sese na kinanda Na kwa unyanga lwa kinubi.

⁴ Mashika yewe Nndumi Iruva kuleshifurisa! Nshikapaa ndoro, Kimaruma kya mashora a maako afo.

⁵ Ee, Nndumi Iruva mashora afo mmaniini nnu! Makusaro afo ni maroo nnu.

⁶ Nndu nrungani nnyamanyaa efi-fo! Nta itondo llimanyaa-fo.

⁷ Vandu valakee vasumanu immya sha mare, Naakwa mmbetana makasha vakainina, Indi mafurunyony varumatwa llung'anu.

⁸ Indi Yewe, Nndumi Iruva. Kukee na Nng'anu kwafika llung'anu.

⁹ Ee, Nndumi Iruva, mashika vakyiduva vafo; Ewo vakyiduva vafo vasherekaa Na yewo vetana makasha mmbo vashenyanyakaa woose da.

¹⁰ Indi finya takwa kwating'anisa sha ta mboo ya ngoroshony. Kwashaamba mafura a ifura!

¹¹ Iriso lyakwa lyalollya vakyiduva vakwa vammaa ivingwa; Kuri kyakwa kyamiita kiiyo kya vetana makasha.

¹² Nndu wa usumanu mmbo ashiininaa sha nsenefu Mmbo ang'anaa sha miri ya Lebanoni.

¹³ Yewo vakee vavaakye efo nnang'ani a mmba ya Nndumi Iruva. Mmbo vashiinaa efo mmbeny ya Iruva weeru.

¹⁴ Mmbo vavikaa ndunda kufike ukuuny; Mmbo vavaa miri itiri finya.

¹⁵ Vavambise sheelyi Nndumi Iruva atiri ilyillya! Mbanga yakwa, nnang'ani ya vayo kulaifo wafinya!