SABURI 90 - BIBILLYA Mareiyo Meele a Iruva

Kya Iruva na Vandu

¹ Yewe Nndumi Iruva kuviiye mbanga (Kirishony) yeeru kira marika na marika!

² Meendi mafumbu nalandevikwa, nta ulana lulandeveiywa, Ni Yewe Iruva, kweiyo pookya llung'anu na llung'anu.

³ Mmbo kwaviira nndu efo kiluulyiny, Kwaamba, “Kyevewuyeny yeni vana va vandu!”

⁴ Kwafo myaaka kyiku sha nkonu umwi nsi! Nsha nkonu wa ukoowu uleira! Kwafo nkimwi nsha ikamba lyimwi lya iringa elyi kio.

⁵ Shaasa mura washa mwiingyi kyikava sha ilala rony, Ngama ikava sha mare amya.

⁶ Ngama akamya na ilambara, Nkwaany akasemwa na yuuma.

⁷ Mashika lwasarumya kyuuka na unyaasi kwafo; Na unyafi lwafo lukalwaantya kwaasha.

⁸ Mmbo kuvikue meesi eru yoo mbee yafo Na findo fyeru fya kyama kwafivika yoo seny ya miso afo.

⁹ Mashika mikonu yeeru myoose mmbo yeera veru kyuuka na unyaasi lwafo. Myaaka yeeru ikeera sha irosa uuwo.

¹⁰ Myaaka yeeru ni makumi mfungare! Kwakooya lutiri finya ikava makumi nyanya, Utore lwa vayo lukava ukyiva na waataruso. Mashika fyaira veru lukasarummya uviny;

¹¹ A mmbi nndu eeshi wiidimi lwa unyaasi lwafo? Na uniini lwa unyafi lwafo shaasa kyikwaani.

¹² Woi Nndumi lumanyisye lwiidimi yekyena mikonu yeeru, Luwoni nrima utiri urango.

¹³ Woi Nndumi Iruva kulore kulawuya-fo! Kuvelyilya varundi vafo?

¹⁴ Luwuutise shapu na ilyillya lyofo kyeeri kya ngama, Neese lushelooka na ifurya mikonu yeeru myoose.

¹⁵ Lufuriseny ando a mikonu yeyo kulelulyisa ukyiva! Sha mashika ando a myaaka ilya lulewonisa makasha.

¹⁶ Mashora afo alolywa kwa varundi vafo; Na itumbe lyafo livelolywa ni vana vawo.

¹⁷ Na ilyillya lya Nndumi Iruva, Iruva weeru lyilukaaye Mashora a maako eru naavirise. Ee-da mashora a maako eru kuivirise!