SABURI 86 - BIBILLYA Mareiyo Meele a Iruva

Kyiterevo kya Itaramo

¹ Woi Nndumi Iruva, kusheevetye kuri kushirouwe, Mashika yeny ni nkiva na mfwafwa.

² Kutirishe muu wakwa mashika shikwiindyaa. Kushikire yeny nndundi wafo shikukusirye.

³ Yewe ni Iruva wakwa, Naasa kushilyillya, Mashika mmbo shikee ikufuuya nsanyin moose.

⁴ Kuufurise nrima wakwa yeny nndundi wafo, Mashika fiterewo fyakwa mmbo shikee Ifirongisa kwafo, Yewe Nndumi Iruva.

⁵ Ee-da Nndumi Iruva, Yewe mmbo kukee nsha na nsari, Kwava na ulyilyi wiingyi kwa yewo vakuterevaa.

⁶ Woi Nndumi Iruva kwaarannyi fiterewo fyakwa; Kwaarannyi unyanga lwa fiterewo fyakwa.

⁷ Nkonu wa ukiva shishekuvaangaa Mashika kusheshiirikyaa.

⁸ Nndumi Iruva, nnang'ani a maruva nnyefo ungyi sha Yewe-fo, Nta mashora avakye afo-fo.

⁹ Vandu va masanga kulevaumba, mmbo Vashaa ikufiirya-ndi Yewe Nndumi Iruva, Mmbo vashearafumaa irina lyafo.

¹⁰ Mashika yewe mmbo kukee nniini Yewe mmbwe mwitana fya wende Nyewe kumuni kukee Iruva.

¹¹ Woi Nndumi Iruva kushiloshe ekyo kukundye shikyitani Mmbo shikwindyaa na waarya! Ngoo yakwa ifure iindya irina lyafo

¹² Yewe Nndumi Iruva wakwa nkwaarafumaa Na ngoo yakwa shoose Mmbo nshaarafumaa irina lyafo llung'anu.

¹³ Mashika ulyilyi lwafo ni lwiingyi nnu uwe yakwa Mmbo kuleshikira ufuny

¹⁴ Woi Iruva, vandu vatiri nrya mmbo vakee ishisheya; Iroda iriiti mmbo lyikundye ishiwaa, Mmbandu valakwiishi Yewe

¹⁵ Indi Yewe, Nndumi Iruva, ni Iruva mwisarya na mwikiiya Mwisisirya, nkukee wa ilyillya na usumanu

¹⁶ Kushiindukye kushisarye Kushiniinge finya tafo yeny nndundi wafo, Kukyire mwana wa kishinga kyafo.

¹⁷ Kushoore wende lwa usha lwafo Valya vashisuyee walollye vasuke Mashika Yewe Nndumi Iruva mmbo kwansheekya na ishivirya muu.