SABURI 85 - BIBILLYA Mareiyo Meele a Iruva

Kyiterevo kya Yeende Ufoo Vanduny

¹ Nndumi Iruva kwalyillya uruka lwafo! Kwedimisya Yakobo kedima ivikyo mbora lyingyi.

² Kwansarya vandu vafo irekwa lyao, Kwavauta ngyulyamari tawo toose.

³ Kwashillya unyafi lwafo loose. Kwara unyaasi lwafo.

⁴ Iruva kukee ukiro lweru luviire kwafo. Uta-u iswa lyafo kweru.

⁵ A mmbo kulusswa llung'anu? A mmbo unyafi lwafo luvaa kwa marika moose?

⁶ A mmbo kulaluniinga-se muu muiya, Naambo vandu vafo vakooye ifura kimaruma kyafo?

⁷ Woi Nndumi Iruva, loore ilyillya lyafo, Luniinge ukiro lwafo.

⁸ Iruva, Nndumi iruva, a shaaranyi shaasa ashaamba, Mashika mmbo aderya vandu vakwe unapwe, Kwakooya valawuyaa-se lyingyi utondo lwawo.

⁹ Ni usumanu ukiro lwakwe lukee afii na yewo vemwindya; Na nng'anu wakwe usindaa urukeny lweru.

¹⁰ Ikyiiyo lyakwe na usaari fikwanannyaa. Waarya lushekulumbaa unapwe!

¹¹ Usaari lushemyaa urukeny, Waarya lusholokaa uka iruveu.

¹² Ee-da Nndumi Iruva, ashekwekkyaa kuwoni iviiri, Na uruka lweru luvike fimu fiingyi.

¹³ Usaari lushekaa mbe yakwe, Na idesye shia takwe.