SABURI 84 - BIBILLYA Mareiyo Meele a Iruva

Ilanga Mmba ya Iruva

¹ Woi Nndumi Iruva, Iruva wa matorito, Apaa mmba yafo isennyi-dwa.

² Nrima wakwa ulangye deny poo ya Nndumi Iruva, Ee, na itirya mmasha. Ngoo yakwa na mwiili wakwa fyalookya Iruva muni muu.

³ Ngyuruu tammbona mmba tawo, Na kishakoore kyikaniingwa kifuri kya yaara maore a vayo, Yoo ng'u ando a kitara kyafo kyeerasya, Woi Nndumi Iruva wa matorito, Mangyi yakwa na Iruva wakwa.

⁴ Ngoma yewo vasinda efo mmba-fo Mmbo valung'ani ikwitikisa.

⁵ Ngoma yewo finya tawo tauka kwafo, Na shia tendaa Sioni mmbo tikee ngoony yakwe.

⁶ Vakaira imungony lya misoru, Vakalyaallwa usoka lwa mura, Ee-da mmbwa ya mateeri yaishura mbora!

⁷ Vakaengera iva na finya shiingyi, Wo umwi kalollyo efo Sioni mbee ya usangu lwa Iruva.

⁸ Nndumi Iruva, Iruva wa matorito arannya kiterewo kyakwa Woi Iruva wa Yakobo kwaaranyi-dwa

⁹ Woi Iruva ngao yeeru lwinduye miso! Lola kisangu kya Mesiya wafo.

¹⁰ Ni kya usumanu shalollya ni kisha shasinda poo Kwafo nkonu umwi-da! Ngota nsindaa kundo kungyi ando a mikonu kyiku Shekundye iva mwirwa mwoongo wa mmba ya Iruva wakwa, Ngota ikaa efo mmba ta veemina.

¹¹ Mashika Nndumi Iruva, Iruva mmbwe mwi na ngao yeeru Nndumi Iruva ashekuniingaa isaryo na nng'anu Na yewo woose vashesindaa na usaari, Nnyasheveemaa kindo kisha-fo.

¹² Woi Nndumi Iruva, Iruva wa matorito, Ngoma nndu akusirye neewe!