SABURI 78 - BIBILLYA Mareiyo Meele a Iruva

Iruva na Vandu Vakwe

¹ Yeni vandu vakwa aranyiny kiloshyo kyakwa. Nrweny maarwi iiranya marero a kana kyakwa.

² A shitarambwe kana kyakwa shirere kwa fyaaso. Shirere mbony ta kasha tikee shisurumi

³ mbony luleita na itimanya, Mbony eto vamiku veru valeloongoya.

⁴ Llushesurumaa vana veru-fo, Lusheongoya ngyeeri tikee isha mbony ta finya ta Nndumi Iruva. Na mashora maniini amwi na findo fya ngyende alentana.

⁵ Aleniinga vana va Yakobo mashingo; Israeli kaivikya mavavaso, yo alevavasya vamiku veru naambo valoshe vana vawo,

⁶ naambo vandu va ngyeeri tishaa, amwi na vana wawo vamanyi Nawo-da vamanyisye vana vao,

⁷ naambo vavike nsia wao kwa Iruva, Valasheirekywa mashora a Iruva, Kya indi vatamballye na mavavaso a Nndumi.

⁸ Valasheeva sha vandeye vao, vandu vatiri nriya na mbafu Irika lletiri isingasinga; lliletiri usaari kwa Iruva.

⁹ Vandu va Efraimu mmbo vetiri fisha mfyo ura, Vakairaa, vakawuya numa nkonu ulya wa fira.

¹⁰ Mmbaletira ivavaso lya Iruva-fo, Vakalema ilatya sheria yakwe.

¹¹ Vakarekyo mashora akwe, Amwi na Findo fya ngyende alevaora.

¹² Usanguny lwa vandeye vawo mmbo aleora findo fya ngyende, Kulya Soani urukeny lwa Misri.

¹³ Karauwa yeeve kavakyillisa kwakulya! Kaseleesa mura wa yeeve ukavaka isimamba!

¹⁴ Kavatetera na ifishi nsanyiny, Na elyi kio kwa say a muro.

¹⁵ Kapara iwe yuumu kulya nng'alo, Kaavanisa na mura mwiingi sha wa yeeve.

¹⁶ Ngyusoka tikauka efo iweny, Mura ukasoka shay a mira!

¹⁷ Naakwa ni indo mmbo valeengera itana ulyamari. Nta mmbalekusirya mashora yo a ngyende-fo.

¹⁸ Mmbo valeesa Iruva efo ngoony tawo, Vevesaa shoonga eto tevasenyi.

¹⁹ Mmbo valearara Iruva veshaambaa, “Iruva mmbo ashiidimaa iluniinga shoonga kunu kasa.

²⁰ Ni kya usumanu alekapa iwe yuumu kukaukafo mura ukasoka shamira, Indi ulalu ashindima dede iluwonisya nkate na nyama.”

²¹ Nndumi Iruva keeta katirwa ni unyafi. Unyaasi lwakwe lukava uwe ya vana va Yakobo. Kiwo na kwa Vaisraeli woose,

²² mashika mmbalekusirya Nndumi Iruva-fo Nta mmbalevika nsia ukiro lwakwe-fo.

²³ Indi arera na mafishi nginii-u Karwa myaango ya iruveu,

²⁴ kavaolotya mana yakwe, Na nkate fyuuka iruveu.

²⁵ Ndu wa vandu kalya shoonga ya vasu! Ee Iruva alevaniinga shoonga ivafye.

²⁶ Alerika uraato taari ya ngama, kwa finya yakwe Uraato elo lukaanta ngyuraato ta taari ya sinde.

²⁷ Kaolotya vandu vakwe nyama sha kiluulyi, Amwi na ndeye tifye sha nsanga wa mbai ya yeeve!

²⁸ Ndeye yeto tileoloka ulaleny lwawo, wo ando wetanyi mmba tawo.

²⁹ Vandu vakalya vakavuura. Mashika Iruvva mmbo alevaniinga efyo vekundye.

³⁰ Indi nta vandelya kufye, Shoonga ikee kaniny kyawo,

³¹ Unyaasi lwa Iruva lukawa uwe yawo, Kawaa vasero va Israeli va mbwaanu.

³² Naakwa ni indo mmbo valeengera itana ulyamari. Nta mmbalekusirya mashora yo a ngyende-fo.

³³ Naasa Nndumi iruva kafiisa fyeeri fyawo Na myaaka yawo kwa ngapwa ta tiny.

³⁴ Wo shaasa alevawaa, valya valesaa-u vakamwindukya, Vakakurya vakawuiya Iruva kwa sina.

³⁵ Vakakummbwa Iruva mmbe isimamba lyawo, Na Iruvva akee uwe ya fyoose mmbe nkira wawo.

³⁶ Indi mmbo valellemba na marero awo nsi; Wo kindo valembia mmbo kyekee wongo.

³⁷ Ngoo tawo ntekutiri nawe-fo. Nta mmbekee waarya ivavara mma yakwe-fo.

³⁸ Lyo we kimmba atiri illillya alevasarya uravi lwawo Nta nyalevarumata-fo. Keengyi mmbo alefweera nyashi yakwe Nta nnalera unyafi lwakwe lusaami-fo!

³⁹ Mmbo alekummbwa wo ni vandu-da Nsha uraato lushiira na irekya.

⁴⁰ Nkeengyi valemfuta kulya nng'alo Na imweengye iswa kulya kasa.

⁴¹ Mmbo valeesa Nndumi Iruva keengyi, Vakeengye eto Mweele wa Israeli iswa.

⁴² Mmbalekumbwa finya yakwe-fo Nta ikummbwa nkonu ulya alevakira na vakiduva vao-fo,

⁴³ llya aletana findo fya isinga-singa kulya Misri, Na ngyende kulya Soani.

⁴⁴ Mmbo aleallwa mira mmyoose ikava samu Amwi na ngyusoka valasheina.

⁴⁵ Mmbo alevarikya makurubu akavamaara Na filwa vakareta findo fiingyi.

⁴⁶ Nre tikalya fimu fyawo; Na ilyamara minda yaawo.

⁴⁷ Kalyamara misabibu yaawo na mmbwa ya masaawe, Na ndunda ta makuu efo nreminy tawo tikalyamarwa ni masaawe.

⁴⁸ Ngumbe tawo katiwaa na mmbwa ya masaawe, Na moonri awo akawaawo ni fyimwii fya ngova.

⁴⁹ Unyaasi lwakwe lukavapaana Vasu va urumato vakaveengye unyashi, iswa na ngatara.

⁵⁰ Kara unyaasi lwakwe lung'ani nta nnalevakyira na ufu-fo; Indi mmbo alevarumata kwa ndwari shiroo.

⁵¹ Kawaa vana vavee woose va Vamisri, Ee, naakwa ni maa efo ulaleny lwa Hamu.

⁵² Numa kasamisa vandu vakwe sha moonri, Kavasongoya kulya nng'alo sha iroda lya findo fya ivikya.

⁵³ Kavasongoya kipwa, nta mmbaleiryaa-fo; Indi yeeve ilemira vakiduva vawo.

⁵⁴ Kaveende urukeny lwakwe weele, Ifumbuny alelyitira mfungwa kwa finya takwe.

⁵⁵ Kaumbuta vandu va uruka elo mbee yaawo; Kaniingya ngyuruka ta vandu yewo tive masaa a Israeli, Kavika vandu va vana va Israeli rembo efo mmbeny tawo.

⁵⁶ Naakwa ni indo valeesa na ilema Iruva Nnini, Nta mbaletamballya mashingo akwe-fo.

⁵⁷ Indi mmbalekapa Nndumi Iruva mungo sha vandeye vawo, Vakasinga-singa sha ura lulakee wiinive.

⁵⁸ Vakaengye Nndumi Iruva iswa kyuuka na ando a irasya maruva awo; Vakanrosya ngoo kalollya kififi kya maruva awo a ipasha.

⁵⁹ Iruva ekyilollya indo karwayo ni unyafi, Kalema Israeli deny.

⁶⁰ Nndumi Iruva kasama kulya Shilo, efo kwekee kwakwe, Kwekaa nnagani a vandu vakwe.

⁶¹ Kalotora Isanduku lya Kyaasa likaipowa; Kaniingya nnduma wakwe kwa vakiduva.

⁶² Kasua vandu vakwe muni, Kavaniingya varumatwe ni usu

⁶³ Muro ukarumata vakoo vawo va kyuumi; Vakoo vawo va vana va kyika vakatura tindi.

⁶⁴ Vakohani vawo vakawawaa ni usu, Na vaka vawo va dingu mmbaiya-fo.

⁶⁵ Llyo nndumi Iruva kakwiipo sha nndu auka rony, Sha nsero nkaari akaariswa ni mfinyo

⁶⁶ Karishisa vakiduva vakwe Kavaishura sony ya llung'anu.

⁶⁷ Llyo alelema va mmba ya Yosefu; Nta nnalesauwa vandu va mmba ya Efraimu-fo

⁶⁸ Indi alesauwa vandu va mmba ya Yuda, Na ifumbu lya Sioni elyo alyikunde.

⁶⁹ Mmbo etana ando akwe eele sha ngyina ta uwe; sha uruka, uruka elo aveyye llung'anu.

⁷⁰ Kasauwa Davidi, ndundi wakwe, Kamuuta efo ishoreny lya iisa moonri

⁷¹ Mmbo alemuuta efo ishoreny lya iisa moonri na ngurana ta vayo, Ave na ishora lya iisa vana va Yakobo mmbo vandu wakwe amwi Na iisa vana va Israeli vakee vandu va Iruva muni.

⁷² Davidi kalosha vandu kwa nrima wakwe moose Kavasongoya kwa ukaari uniini.