SABURI 77 - BIBILLYA Mareiyo Meele a Iruva

Ifweeriswa kyeeri kya ukyiva

¹ Shafuuya Iruva kwa unyanga uniini. Shafuuya Iruva naambo aidimi ishirouwa!

² Kyeeri kya ngatara takwa, Shavaanga Nndumi shaorwa maako akwa kyeeri kya kio kuleefo yaara. Nta shilalollye nndu weeshifweerisa.

³ Shiisoonngyaa Iruva neesokywa mfyoova, Shiikusaraa neerovywa nriminy.

⁴ Shalala rembo tarara kukakya, Shasavaa nriminy, shalemwa irera!

⁵ Shakusara kya mikonu ilemmira, Shakummbwa myaaka ya kasha.

⁶ Kio shakusara na isoonngya nriminy. Shakusununda neekuvesa ngoony.

⁷ A ndesa, Nndumi mmbo alluisityo-fo deny? Nkyo nnyakiloora lyingyi ilyillya lyakwe?

⁸ A mmbo isarya lyakwe lyammanda deny? Nkyo, nnyakyiindya-se fyaasa fyakwe?

⁹ A ndesa Iruva mmbo anrekywa iva mwiilillya? Nkyo nnyashi yakwe yammwiima ilillya?

¹⁰ Shawuya shaamba, “Kindo kikeeshivavisa mmwasi, Nnyelyi Iruva yeto ang'ani alakeetana nta kindo kimwi kyimaruma kyeru!”

¹¹ Mmbo shikummbwa mitannyi yafo yewe Nndumi, Mmbo shikusara mashora afo a kasha ang'ani.

¹² Mmbo shisoonngya kya mashora afo. Neekusara kya mirunndye yafo ing'ani.

¹³ Woi, Iruva wo kindo kukeetana mmbo kikee kyeele. Ni Iruva ungau ang'ani sha Iruva weeru?

¹⁴ Yewe ni Iruva wa mitannyi ya wende! Yewe koora masanga wiidimi kutiri.

¹⁵ Kwa woko lwafo lutiri finya kulekira vandu vafo, Kwakyira ngyeeri ya Yakobo na Yosefu.

¹⁶ Kyeeri mura wekulollya ee Iruva Kyeeri mura ulekulollya mmbo valeereya nnu! Yee, yeeve ikarerema fika alya ndilyiny.

¹⁷ Mafishi akapusswa mura; Maruruma akaitiwa efo nginii-u; Fimwii fikamika-mika wo ando.

¹⁸ Kidina-si kya iruruma lyafo kiryani na kitita-si, Ukova lukamikya ulana na uruka lukaring'ina na irerema.

¹⁹ Yewe kwavika shia tafo uwe ya yeeve, Kweenda uwe ya mura ulya mwiingyi, Lyo ngyayo tafo ntelollywa-fo.

²⁰ Kwatetera vandu vafo sha moonri, Veeteterwa ni Mose na Aron.