SABURI 76 - BIBILLYA Mareiyo Meele a Iruva

Iruva ni mmbingyi

¹ Uyuda, Iruva mmbo aishiwa; Na irina lyakwe lyikarumishwa Israeli.

² Kyeny kwakwe ni Yerusalemu; Na kundo kwakwe kwekaa ni Sioni.

³ Efo kafisha mife ya nkiduva, Kafisha ngao, usu na fisha fya fira.

⁴ Yewe Iruva, itumbe lyafo mmbo lying'ani lyikailannya Mafumbuu a llung'anu.

⁵ Valya vatiri finya vansokwa filya fyoose vetiri. Ulaalu mmbo valele rony ta ufu. Matorito valya va fira vakasiiywa ni finya deny.

⁶ Ee iruva wa Yakobo, llya kulevasakira, Frasi na vesaama frasi mmbo valefwa popoto.

⁷ Ee, Iruva mmbo kweeresye kweelannya! Mmbovi ashiidimaa isalala mbee yafo kyeeri kwammiswa?

⁸ Mmbo kwamanyisya mirumbuye lwafo ukya iruveeu; Ulana lukaereya neemalallya,

⁹ kyeeri kulesalala kwarummbwa mwaandu, Kwakyira valya woose vakeelamywa yaa ulaniny.

¹⁰ Nyashi ya vandu mmbo ikweengye kwarumishwa mmbandu, Na valya vaturunya fireny vavika sukukuu tafo.

¹¹ Inutye Nndumi Iruva, Iruva waany kyaasa kyany; Yeni mukee kufii nniingyeny findo fya pya Iruva yeto aeresye.

¹² Yeto asokaa vasero va kimangyi muu! Yeto aeresye vamangyi va ulana.