SABURI 73 - BIBILLYA Mareiyo Meele a Iruva

Kyitabu Kya Kararu Saburi 73-89 Usumanu lwa Iruva

¹ Kyadede, Iruva ni mwaarya kwa vandu yewo varilalyi, Ni mwaarya kwa yewo vatiri nrima mwaa.

² Mmbo shekee kufii, shaalashe makusaro! Shafikya kufii shuute-pa.

³ Shavatirya kififi vandu vakee mbafu Elyi vakeewona nsupa efo mashoreny awo.

⁴ Mashika wo, mmbakeeviniswa-fo; Miili yaawo ikamamya na itira finya.

⁵ Mmbakeetirwa ni maariso a kivandu-fo Nta mmbakeekwanannya na maariso sha vandu vengyi-fo.

⁶ Vakaallwa kiila sha nse efo singony yaawo, Myaandu kwawo, vakayaallwa sha soori yeekusikya.

⁷ Makasha akalollywa efo misony awo ngata a fummbye, Efo miriminy yaawo kukeeshwa-fo makusaro a itana weesi.

⁸ Vakasekya vengyi nkyere-kyere na ivarerya makasha, Vakakushoba, neevika kyama kyeyaafinya vengyi.

⁹ Na kana kyawo vakatatala Iruva efo iruveeu, Na kana kyawo vakarumana mbee ya vandu kunu ulaniny.

¹⁰ Naakwa ni vandu va Iruva vakavalatya, Nta valaidimi ilollya ukasha lwawo na yiirikya wo kindo vakeyaamba.

¹¹ Vakaamba, “A niinda Iruva ashiidimaa imanya?” “Iruva yeto wa uwe mmbo ashiidimaa imanya?”

¹² Niindo indo vandu veesi vakai Mmbo vatiri wo kindo na umasi lwawo lukeengereka.

¹³ A-nkonu wakwa mmbo ulefwa-ki Shileinndya indo mavavaso shilatani ulyamari?

¹⁴ Mmbo shilewonisa ngapo nkonu piti; Na ilyiswa ukiva wo nkonu ngama.

¹⁵ Kukooye shevera shawo, Mmbo shevaa nkumbi shawo nnang'ani ya vandu vafo.

¹⁶ Shekusara deny, kya mbony yei; Indi-lyo ikaengera iva shiroo mmwasi.

¹⁷ Kutani, llya shaanga kweele kwafo; Llyo shemmanya kindo valyamari vashetannywa.

¹⁸ Kya dede ni yewe kulevavika ando kurendeiye, Ni yewe kuleveengye vakawasi vakasia-deny.

¹⁹ Vakamamitwa nalyimwi, Na ivivywa kwaasha kwa weeresi.

²⁰ Vakavaka yoorya, kyeeri nndu akwiipo ngama nnyikerekyeka Ni kyeeri kushooryaa na ngama kwakwiipo.

²¹ Kyeeri makusaro akwa ekeevava Na ngoo yakwa ikadoshwa;

²² mmbo shekee nrung'ani, na itondo, Shawaka ifisi lya ngoroshony mbee yafo.

²³ Naakwa ni indo, mmbo shikee na yewe kyeeri kyoose; Kushitire woko lwakwa usha.

²⁴ Ni yewe kusheshitetera songosiny, Na mafurumyony kusheshiwarya efo itumbeny.

²⁵ A mmbi ungyi shitiri efo iruveeu kuuta yewe? Na kunu ulaniny nkwiifo kindo shikilangye kyikuilannyi yew-fo.

²⁶ Naakwa shatura finya ya mwiili na nrima, Yewe Iruva, mmbwe turuve yakwa; ya nrima wakwa na muu wakwa.

²⁷ Yeto akee kilasha na yewe kya dede mmbo asherumakaa, Neeto akukapaa mungo mmbo kushemmamitaa,

²⁸ indi, kyakwa yeny ni ikaa kufii na Iruva! Yewe Nndumi, Nndumi Iruva mmbwe mbanga yakwa, Mmbo shirumishaa mashora afo moose kutannyi.