SABURI 69 - BIBILLYA Mareiyo Meele a Iruva

Kiiyo kya weekyi

¹ Woi Iruva, shakutereva kushitarame, Mura wamfika singony.

² Shikeerekya ibwashiny yiingyi; Shilatiri ando kweevika urende. Shanrekya ndilyiny ya mura, Shikeyeetwa mmatundulu.

³ Shansiiywa mfinya shikapaa kiiyo; Na uroo lwakwa lwammuma miso akwa ansingira. Shikwereryaa yewe Iruva wakwa.

⁴ Vandu vashisuuye mmbo veengyi vakailannya fii ta nrwe wakwa. Neewo mmbo vashisuuye kuleefo kyimaruma, Yewo vakunndye ishiwaa mmbo vatiri finya vakailannya, Yewo vakeshifinngya findo fya wongo a mmbo shiviira kindo kilakee kyiive.

⁵ Woi Iruva yewe mmbo kushiishi na nshushwa; mmbo kwiishi makasha akwa moose.

⁶ Valya vakuvikye nsia valasheesuka kyimaruma kyakwa, Ee, Nndumi, Nndumi Iruva wa matorito; Valya vakeekuruuya valashesuka kyimaruma kyeendwa nnyeny, Woi Iruva wa Israeli.

⁷ Mmbo vakeeshiipala kyeendwa ni yewe; Shisikya kyisangu kyakwa kyimaruma kya usutu.

⁸ Shava sha mwiny nnang'ani ya vana va-ma; Shavaka mwiny kwa vandu va mmba yakwa.

⁹ Ikunda lyakwa kwa mmba yafo mmbo lyanshirovya, Fyaararo fyafo fyoose ni yeny fikeeshiwuuya.

¹⁰ Llya shilekunyiisa shakootoya, Vandu mmbo valeshikaba mungo.

¹¹ Kyeeri shileraa soori ta makunnya shikee kyiiyony, Kwawo mmbo shileva seko.

¹² Shakapwa mang'ang'a ni vandu efo shia ta mbasero, Na vanangwa vakeemba fiimbo fyeeshiipala.

¹³ Indi, kyakwa yeny mmbo shakutereva woi Nndumi Iruva; Kushirouwe kiterewo kyakwa kyeeri ekyo kukunndye, Kwa isarya lyafo kushirouwe, Yewe kukee mwiikyira wa dede.

¹⁴ Yewe kukee wa usumanu mmbwe kushikiraa; Shilashemirwa ni ibwashi! Yewe mmbwe kushuuta efo maakony a vakiduva, Neefony ndilyiny ya mura.

¹⁵ Shiringa shileetwa ni iruva lya mura, Ao shimirwa ni ndilyi ya mura, Na kirori kilasheshimira.

¹⁶ Shirouwa woi Nndumi Iruva, kyimaruma kya ikunda lyafo lying'ani, kushilole kwa isarya lyafo lyiingyi.

¹⁷ Kulakusurumi ishinga lyafo shirouwa swany; Naambo kukooye ishikira, mashika mmbo shikeesisywa!

¹⁸ Osho kufi na yeny naambo kukooye ishikira; Kushuute vakiduva vakwa eva vakee veengyi.

¹⁹ Yewe mmbo kwiishi ngata shikeeyaararwa Kwamanya findo fikasha na usutu shikeekwanannya nalo, Kwamanya naakwa mmbakiduva vakwa woose.

²⁰ Fyaararo mmbo fyanshifisha nrima wakwa, Kutani shoota-pa. Sharumya mwiishifyeerisa shantura, Naakwa mmbweshiviirya muu shantura.

²¹ Ando eeshiniinga shoonga; Vakashiniinga kireeyo, Ando eeshiniinga mura wa kyaakuka vakashiniinga siki.

²² Ifura lyawo lyive nreiyo efo ifureny lyawo, Na sukukuu tawo ta firaso tive ta kiiyo.

²³ Miso awo nafwe valaidimi ilollya kindo, Na kyeeri kyeekuumbya amwi kuvanyanyatye kwaasha.

²⁴ Vapusuye nyashi yafo, Vakwaanannye na ngapo yafo.

²⁵ Mmba tawo tirewa marama Tilatiri nndu moose asammya-fo.

²⁶ Mashika mmbo vakeesisya valya vakee vakape; Vakavaengerya mavavywo valya valemmbaviswa.

²⁷ Vakapwa kikwaani na mitannyi yaawo mikasha, Valemmyi-fushu isarya lyafo.

²⁸ Marina awo afuutwa-deny efo kyitabuny kya muu; Marina awo alalollywa-deny efo kyitabuny kya vasumanu-fo.

²⁹ Lyo yeny mmbo shilwee na isiiywa mfinya, Woi Iruva shisaleesa kwashikira.

³⁰ Mmbo shirumishaa irina lya Iruva shimwiimbyaa, Mmbo shirumisha neemwaarafumaa.

³¹ Nndumi Iruva mmbo asennyo mmwasi, Ngota kiraso kya ng'umbe, ao ngoleta ya marende.

³² Vafwafwa vakalollya indo mmbo vafura mmwasi, Valya veindya Iruva mmbo vashiishwa nsupa.

³³ Mashika Nndumi Iruva, mmbo aarannya vaturi; Nta nnyarekywa valya vakwe vakee kyifingyony-fo.

³⁴ Yewe ngina na ulana rumisha Iruva, Yeeve na fyoose fitiri muu firumishe Iruva.

³⁵ Mashika Iruva mmbo ashekiraa muri wa Sioni Neetana-se miri ya Yuda; Mfo kundo vandu vakwe vashekaa ive yaawo.

³⁶ Mmbo kushevaa ding'u ya vana va varundi vakwe, Na valya vankunndye mfo kushevaa kundo kwawo kwekaa.