SABURI 66 - BIBILLYA Mareiyo Meele a Iruva

Kyiimbo kyeerumisha na Yaarafuma Iruva

¹ Eni vandu va ulana woose kapyeny Iruva nndoro!

² Imbeny itumbe kya irina lyakwe! Mwiimbyeny itumbe nemwaarafuma!

³ Via Iruva, “Mashora afo aeresye! Mmbo kutiri finya kwailannya vakiduva vafo vakashoiya mbee yafo.

⁴ Vaulana woose vakamwiindya-we; Vakamwiimbya fiimbo fyenndumisha rumisheny irina lyakwe.”

⁵ Oshony mulole mashora Iruva atannyi; Mashora akwe mmbo aeresye nnang'ani ya vandu!

⁶ Kaallwa yeeve ikava ando kuumu, Vandu vakakillya mura na marende; Neese lukafura nawe.

⁷ Yeto mwiishillya kwa wiidimi lwakwe llung'anu, Na miso akwe akalola masanga moose. Kulave-fo nndu atana kilasha nawe.

⁸ Arafuminy Iruva weeru, eni masanga moose Na unyanga lwa fiimbo fyany lwiitiwa.

⁹ Eto muyamuu nnang'ani a vandu, Kasaleesa marende eru lulasherendeya.

¹⁰ Yewe Iruva, kwaluvika kyeesony, Sha saabu isheeswa na muro.

¹¹ Kwalureeya nreyo wa makunga, kwalweekyerya irio lyikalurovya.

¹² Kwara vandu vakalusaama nrweny. Kukeera murony na mureny, Indi ulaalu kwalluvika ando kwa urilalyi.

¹³ Mmbo shishangaa mmba yafo na firaso fyeekora na muro Shiinndye kyaasa kyakwa

¹⁴ Kilya firomu fyakwa fyerera na kana kyakwa shavika kyaasa kyeeri sheeke ngatareny.

¹⁵ Mmbo shikweengye firaso fisha fyeekora na muro Kiraso kya mfwaamu nsha kya ngurana ya suva, Mmbo shiniingya kiraso kya ngoleta na ndafu.

¹⁶ Oshony mwaarannye, eni moose mweereiye Iruva, Neeny shimuvieny findo efyo alenshitannya.

¹⁷ Shammbanga ashitarami, Shawuya imwaarafuma.

¹⁸ Kukooye sheekusarye nriminy itana fya ulyamari, Nndumi Iruva, nnyeeshaarannya-fo.

¹⁹ Indi kya dede, Iruva aleshaarannya, Ee, kaarannya marero a kiterewo kyakwa.

²⁰ Iruva narumishwa, mashika nnyalelema kiterewo kyakwa-fo, Nta nnyaleshiima olyillya lyakwe-fo.