SABURI 65 - BIBILLYA Mareiyo Meele a Iruva

Kyaanu na yarafuma Iruva

¹ Nkukwaani yaarafumwa yewe Iruva efo Sioni, Na vandu woose yiinutya fyaasa fyawo vekuvikya.

² Yewe mwiirouwa fiterewo fyeru, Vandu woose vakakusheya yewe.

³ Kyeeri lwarovywa ni marekwa eru, Neewe kwavafwaaya ngyulyamari tawo.

⁴ Ngoma ya valya kulevasauwa kwaveende kufii na mmba yafo, Vashesinda efo mmba kwafo, Efo mmba yafo sheele.

⁵ Kya mitannyi yafo ing'ani kwalurouwa na ilukira, Yewe Iruva wa ukiro lweru; Fyoose fya kunu ulaniny vakavika nsia kwafo yewe, Na valya vekee kwaasha na yeeve.

⁶ Kwa wiidimi lwafo kwasaleesa mafumbuu ando a vayo; Wiidimi lwa finya yafo lukalollywa.

⁷ Kwafweerisa yoona lya yeeve na matundulu a vayo, Kwafweerisa na kyoorongye kya vandu.

⁸ Mashora afo akeerese ulana loose Ando koose kukaa-fo ifura Uka taari ya ngama kufike ya nkwaany.

⁹ Yewe kweende mbora ya mmbwa urukeny, Kwanisa sumbai lukawonisa fyeelya, Mira ya Iruva ikaishwa mura; Kwaidimisya uruka lukavesa fimu, Niindo kwasongosya uruka lwafo.

¹⁰ Kwaluniinga mmbwa imaaye yefo mareminy eru; Mmbwa shisiise ikanisa sumbai, Mmbwa ya umwiina ikanisa uruka, Kwavikya mbeu mbora timmye.

¹¹ Kwaluvikya mbora ya mwaaka; Wo ando kuleera kukaishwa mbora,

¹² Efo kasa kukaishwa mare a findo, Ikava-fo mbora efo mafumbuu.

¹³ Moonri akafumbuka, akaengereka, Mamungo a nganu akaishwa nganu. Vandu woose vakaarafuma veefuraa!