SABURI 62 - BIBILLYA Mareiyo Meele a Iruva

Nsia kwa uringyi lwa Iruva

¹ Nrima wakwa mmbo ukevereya Nndumi Iruva Mashika ukiro lwakwa mmbo lushuka kwakwe.

² Mmbwe muni turuve yakwa, na ukiro lwakwa, Ngawo yakwa kuleefo weeshikuna.

³ Mmbo musakkyaa neeny mufike-kwi Yeny shikee sha isimamba lyankwiinyika Na uvarye lukeesinga.

⁴ Mmbo mutiri kyama kyeeshituula-si shuuke yoondo kitiminy kyakwe. Filya fya wongo mukafura nafyo. Efyo fya kana kyany ni mbora, Indi efo miriminy yaany ni kidengo kyiifo.

⁵ Ni kwa Iruva mweni shivikye nsia, Mashika ngarami yakwa, ni kwakwe yuukye.

⁶ We mmbwe turuve yakwa na ukiro lwakwa, Mmbwe turuve yakwa kuleefo weeshikuna.

⁷ Ukiro na wiidi mmbo fyuukye, maakony a Iruva. Iruva mmbwe nringyi na finya yakwa.

⁸ Kyeeri kyoose vikeny nsia kwakwe, yeni vandu. Mongoyeny efyo fyoose fikee yefo miriminy yaany, Mashika Iruva mmbwe kirishony kyeru.

⁹ Vandu ni kyimwi sha mumuyo woose Vaniini na vadu ni kyimwi kwavavika kyeesony, Ni kyimwi sha uraato woose mmbo vakee vaangu.

¹⁰ Kulasheevika nsia findony fya ntambo, Mulakwiishike na masaa a unyinyi, Nta kulavike-fo nsia kwakooya eengereka.

¹¹ Iruva mmbo alenrera lyimwi, Na yeny mmbo shilemmita kyeengyi na kyeengyi: Sheelyi finya na wiidimi ni kwa Iruva tuukye.

¹² Nalyo ikunda lyakwe ni lya fyeeri fyoose, nawe kaniinga wo nndu kyikwaani na mitannyi yakwe.