SABURI 60 - BIBILLYA Mareiyo Meele a Iruva

Kiterewo kya Ukiro

¹ Woi Iruva, kwallurekywa kwarooywa ni ngoo. Kwalwiima uringyi; lwakutereva kulutarame.

² Kweende kidina-si sumbai ikaparika. Ulaalu ivavarye mmbe; mashika ikeewunduka.

³ Vandu vafo vammatarika king'ani, Vakasinga-singa, sha vandu vana wari.

⁴ Ikyimba valya vakweereiye Naambo vaidimi iturunya.

⁵ Valya vakunndywa vakirwa; Vaidimi ivinga kwa finya ya woko lwafo usha, kulurouwe.

⁶ Iruva mmbo arera ooka ando kwakwe kweele: “Ulaalu mmbo nshaava uruka lwa Shekemu. Shiifurye nsheava imungo lya Sukoti fyenga-fyenga.

⁷ Giliadi nnyakwa, Manase nnyakwa. Efraimu ni kofia yakwa ya minya, Na Yuda ni nsengye wakwa wa umangyi.

⁸ Moabu ni ikarai lyakwa lyeekusangya; Makubasi akwa mmbo nsheerya Edomu Nshekapa kilewa kya uvingyi kulya Filistia.”

⁹ Mmbovi asheshirwaa muriny wa turuve? Mmbovi asheshikamaraa shifike Edomu?

¹⁰ Ale! Iruva, mmbo kwalulema deny? A matorito eru mmbi ashelwiimya?

¹¹ Luniinge ngarami kya vakiduva veru, Mashika weekyi lwa vandu llumaa kindo-fo.

¹² Lwikee na Iruva mmbo luvingaa, Mmbwe yeto ashekakasha vakiduva veru.