SABURI 59 - BIBILLYA Mareiyo Meele a Iruva

Kiterewo kya Uringyi

¹ Shuuta efo kwa vakyiduva vakwa, Woi Iruva wakwa, Shisiika ewo vakee kilasha kyakwa vakeesalala neeny.

² Shuuta efo kwa vetana makasha; Kundeshuuta kwa yewo vatirwa ni nyura yeena samu ta vandu.

³ Lolaany mmbo vakeshilaaya ikunda ishuuta muu wakwa. Vandu valyang'a vatiri kyama kyeshiwaa,

⁴ Nta kuleefo kindo kyimwi kyikasha shilyamarye. Woi Iruva, mmbo vankudeesya kyakwa. Kwiipo! Kwasha isheekya woi Nndumi Iruva.

⁵ Yewe Iruva wa Israeli, Kwiipo kweende ngapo yafo kwa masanga moose, Kulaseerise-fo yewo vatiri kyama kyeshiwaa-fo!

⁶ Wo nkonu nkwaany mmbo vawuyaa Vekoomaa sha fite Neraa-raa kunu muriny.

⁷ Arannya nnyoo vakai veshereese na yaara-ra kwa kana kyawo; “Vekusarye a mmbo kwiifo nta nndu umwi aveetye.”

⁸ Indi yewe ee Nndumi Iruva, mmbo kukeevaseka. Kwaveepala-deny vandu ewo valakwiishi.

⁹ Oo finya yakwa; ni yewe shikurumishaa. Yewe turuve yakwa.

¹⁰ Iruva wakwa, ilyillya lyafo mmbo lyinga'ani. Yewe mmbwe mmbingyi wa vakiduva vakwa.

¹¹ Woi Iruva kulashevawaa uviny-fo, Vanyanyate kwa finya yafo kutani vaoloka sumbai, Woi Iruva ngawo yeeru.

¹² Wo kindo vakeerera ni ulyamari, Marero a kana kyawo, Ikwiishika lyawo vafinngywa mwaandu mashika ni kidengo na wongo.

¹³ Nyashi yafo ivamamite! Vamamitwa valalollywa lyingyi! Vandu vamanyi Iruva mmbwe mwiishillya Israeli Kundefika ulaniny koose.

¹⁴ Wo nkonu nkwaany mbakeewuya Vekoomaa ngata ya fite Neeraa-raa yefo muriny.

¹⁵ Veelengetya efo neefo veeruuya fyeelya Valaambuura, vakatiillya.

¹⁶ Indi yeny mmbo shikwii mmbya wiidimi lwafo shikwiimbyaa. Shikwiimbye kwa unyanga uniini kya ikunda lyafo lying'ani. Mashika yewe mmbwe finya yakwa, Na mbanga kundo kweyoovya.

¹⁷ Yewe kukee finya yakwa, mmbo shirumishaa wiidimi lwafo, Mashika yewe Iruva mmbwe ngawo yakwa, Iruva wa ilyillya lying'ani.