SABURI 58 - BIBILLYA Mareiyo Meele a Iruva

Kiterewo kwa Iruva nakape valyang'a

¹ Eni vashilyi, dede murumbuyaa vandu fikee fya usumanu Mukautya vana va vandu efyo fikwaani?

² Oode, Ni makasha nsi mukusaraa itana; Mukakwaanisa makasha ulaniny koose.

³ Mmbo vekee vakasha kulaore vemmbonika; Vakaamba wongo kupookya mawonikyony awo.

⁴ Wakatira kireeyo ivakye kireeyo kya shoka; Mbimbi ikavaka ishoka lyifinikye maarwi,

⁵ elyo lyilashiita nta unyanga lwa mmbavari mwiilafya, Ao kyiimbo kya mmbavari nsavi.

⁶ Woi Iruva! Vaillwe mayoo efo kaniny kyawo, Ee Nndumi Iruva! Efo kaniny kya miiso yeto,

⁷ Vasarumye sha mura ukerekya na sumbai shuumu. Vakakashwa sha mare na yuuma.

⁸ Vasarumye sha ikoru lyikeyeeka vavake mwana awonika, Ekee mfu alandelollye nkyeere.

⁹ Kulaore vammanya kyeni, vailuwa Sha nndu ashiillwaa miinga kwa nnyashi ya Iruva, Vavivitywa kwaasha veifo na muu.

¹⁰ Ewo vasumanu vashefuraa kyeeri vashelollya ngapo. Ya yewo veetana makasha mmbo ashesangya marende akwe efo samuny ya valyamari.

¹¹ Vandu woose mmbo vashaamba; “Ni kya dede kwiifo mbusha iva nndu nsumanu, Ni dede kwiifo Iruva yeto mwiileta mwaandu yaa ulaniny.”