SABURI 56 - BIBILLYA Mareiyo Meele a Iruva

Iruva mmbwe finya yakwa

¹ Shilillya woi Iruva, Mashika shanlyingillywa mmbakiduva vakwa. Nkonu piti mmbo vakeeshifota.

² Vakiduva vakwa mmbo vakeeshikakasha nkonu piti, Vakakapana na yeny kwa kyiila.

³ Kyeeri kya weerei, Ni kwafo shivikye nsia.

⁴ Kwafo Iruva mwiirumishwa, Iruva yeto shinkusirye kuleefo werei? Mwana wa nndu asheshitannya-ki?

⁵ Nkonu piti mmbo vakeeruuya ilyamara mashora akwa; Makusaro awo moose mmbo vakekusara kilasha kyakwa.

⁶ Mmbo vakesununda mbony takwa, Na inunua meengye yakwa myoose, Kindo vakunndye ni ishuuta muu.

⁷ Woi Nndumi vataiye ekyo kyikwaani na mitannyi yaawo; Woi Iruva, nyashi yafo iwoye vandu yewo.

⁸ Yewe mmbo kwiishi ngata valenshisisya, Kwamamya na misoru yakwa ngata ifye yefo shupeny yafo, Ni yefo kyitabuny kyafo wo umwi akai.

⁹ Nkonu shankutereva weekyi Vakiduva vakwa mmbo vakeviirwa numa vakawuya. Mmbo shiishi shamanya Iruva mmbo akee kyaalu kyakwa.

¹⁰ Mmbo shivikye Iruva nsia na irumisha irero lyakwe, Shivikye Nndumi Iruva nsia na irumisha irero lyakwe.

¹¹ Iruva mmbwe shimmbikye nsia kuleefo weerei Nndu wa vandu nkyoki asheshitannya?

¹² Ee! Iruva, ni kuti shiinndye kyaasa kyakwa, Shisheniingya kyaasa kyakwa kyeerumisha.

¹³ Mashika ni yewe kulekira muu wakwa ukakya ifwa; Kwaseleesa marende akwa. Shaidima isalala mbee ya Iruva, Yefo seny ya muu.