SABURI 54 - BIBILLYA Mareiyo Meele a Iruva

Kiterewo kya weekyi lwa vakiduva

¹ Woi Iruva, shakutereva na irina lyafo! Kushitarame kwa finya yafo.

² Woi Iruva arannya kiterewo kyakwa. Shilootya maarwi afo, kwaarannyi kiterewo kyakwa.

³ Mashika vandu mbafu; Vammbika kyama kyeeshimamita. Vandu valyang'a vankundeesya ishireta muu wakwa; Vandu valaereiye Iruva.

⁴ Iruva mmbwe mweekyi wakwa. Nndumi Iruva mmbwe ngarami ya muu wakwa!

⁵ Mitannyi eyo mikasha, nnyo ishevaa ngapo ya vakiduva vakwa. Kwa isarya lyafo, woi Iruva kushevamamitaa.

⁶ Kwa nrima weefura shishekuutyaa firaso, Shisheniingya kyaanu kyeefura kwafo yewe Nndumi Iruva, Nalyo itana indo, kyikava nnduma nsha.

⁷ Kyimaruma kya elyi kuleshitarama, Kwashuuta efo ngatareny yeto, Vakiduva vakwa vakavingwa, shiilollye na miso akwa.