SABURI 51 - BIBILLYA Mareiyo Meele a Iruva

Itereva Ifwaayo

¹ Shifwaya, Woi Iruva, Kwi isarya lyafo, Kushuute ulyamari lwakwa, Kyeendwa ni isarya lyafo kumuni.

² Kushisangye deny uravi lwakwa, Kushisangye ulyamari lwakwa loose.

³ Shiishi deny uravi lwakwa Kyeeri kyoose mmbo shilollye ulyamari lwakwa.

⁴ Nshilekulyamarya yewe kumuni; Shatana findo fikasha mbee ya usangu lwafo. Ni usumanu deny elyi kwashuutya uvingo,

⁵ Ukya iwonika lyakwa, mmbo shikee llyamari Kulaore shammbonika mmbo shekee llyamari.

⁶ Yewe mmbo kwasennyo na nrima ukunyiisye, Yewe mmbwe kushimanyisya waarya kirika.

⁷ Kushisangye na miisi, na yeny shiile peru, Kushisangye na yeny shive mwaa ngota kyaamwi.

⁸ Kushallwe shikwiite ifura na ikyesa; Maffwa akwa akooye ivanga.

⁹ Kulalole ngyulyamari takwa. Kurekyo deny meesi akwa moose.

¹⁰ Woi Iruva shyuumbya ngoo sheremutu. Kushiniinge nrima mwiiya nsongovisi.

¹¹ Kulashisurumi usangu lwafo, Nta kulashisoke mumuyo wafo mweele.

¹² Kushiviirye ifura lya ukiro lwafo, Kushivangise na ngoo shaantu

¹³ Shiloshe veetana makasha usumanu lwafo, Na ewo vatiri ulyamari vakuwuuye.

¹⁴ Woi Iruva, Iruva wa ukiro lwakwa, Kushikire samu ilashepusuka, Na ulumi lwakwa lusheimba usumanu lwafo.

¹⁵ Woi Nndumi Iruva tarambwa firomu fyakwa, Na kana kyakwa karere usuri lwafo.

¹⁶ Mashika nkukundye irasyo-fo sherasaa, Yewe nkukundye kiraso kya ikora-fo.

¹⁷ Kiraso kya Iruva ni nrima ukunyiisye, Ngoo ikunyisye itirwa mbwiiri, Woi Iruva nkuiminaa-fo.

¹⁸ Kutannyi Sayuni mesha kya ikunda lyafo Kuseleese muri wa Yerusalemu.

¹⁹ Llyo kusennyo mfiraso fya usumanu Firaso fya ikora fyerasya Llyo vasheniingya ngumbe uwe ya kitara kyafo kyeerasya.