SABURI 38 - BIBILLYA Mareiyo Meele a Iruva

Kiterewo Kyeeri kya Ngapo

¹ Woi Nndumi Iruva, Kulashisakire kwirooyo nngoo! Kulashikape kyeeri kwatuluka nnu!

² Mife yafo ikeshivavisa, Woko lwafo lukashirovya.

³ Mwiili wakwa mbutiri muu-fo, Kimaruma kya isua lyafo;

⁴ Mafua akwa akatura muroro, Ni kimaruma kya ikulyamarya.

⁵ Ulyamari lwakwa ni wiingyi, Lukashirovya sha irio iroo.

⁶ Fyaasha fyakwa mmbo fipooye pururu, Kyeendwa ni utondo lwakwa.

⁷ Shakwinyika shafika sumbai shikunyiisye. Shiifiraa nkonu piti.

⁸ Malungo akwa anrovyo ni ndwari, Mwiili wakwa mmbutiri ng'waani-fo.

⁹ Mmbo Nndumi kwiishi makusaro akwa. Kavemanya na kiiyo kyakwa.

¹⁰ Nrima wakwa mmbo ukesaukwa, na finya tikashisiyya, Na miso akwa akaishwa ireema.

¹¹ Vanavama na mbuya takwa mmbo vanshirisha kyeendwa mmaronda yoo akwa. Na ewo va mmba yakwa sheni nawo vakaveshirisha.

¹² Valya vakundye ishuuta muu vakareiya mereiyo; Vakeshekyerya makasha vekundye ishuuta muu. Vakasinda nkonu piti vevikaa kyama uwe yakwa.

¹³ Indi yeny shava mbimbi sha nndu shilaitye. Shavaka nndu nalaishi irera nta shilaidimi yaamba kindo.

¹⁴ Ee-da shavaka nndu nalaitye, Shavaka nndu nalashiidima ikweekya.

¹⁵ Indi yeny mmbo shikuvikye nsia, ewe Nndumi Iruva. Nndumi Iruva shaarannya, woi Iruva wakwa.

¹⁶ Ewo vashisuuye, “Valashefurya ukiva lwakwa, Na ishiseka elyi shatura finya.”

¹⁷ Mikonu myoose mmbo shikevavyo, Na ulalu ni kufii shilemmyo.

¹⁸ Mmbo shakurya makasha akwa; Mashika anshengye tingwa.

¹⁹ Vakiduva vakwa mmbo vatiri finya; Ewo vashisuuye ni veengyi, Nta valatiri kimaruma.

²⁰ Mmbo vakeshitannya makasha Kyeendwa ni yoo akwa mesha.

²¹ Kulashitiye woi Nndumi Iruva. Kulashekaa kwaasha na yeny woi Iruva wakwa.

²² Iluya swany kusheekye, Yewe Nndumi Iruva mwishikira.