SABURI 37 - BIBILLYA Mareiyo Meele a Iruva

Weesi lwa Yewo Vasaari na Valyamari

¹ Kulaatarike kimaruma kya vandu vakasha. Yewo vetana uravi kulavatirye nkuushu.

² Mashika wo mmbo vavivika swany sha nyasi. Mmbo vashumaa sha mare mavisi.

³ Kusirye Nndumi Iruva na itana mesha. Kuidimi ikaa yaa ulaniny kulatiri mbese.

⁴ Kuruuye ifura lyafo kwa Nndumi Iruva, Nawe akuidimisyaa fya nriminy wafo.

⁵ Rambikya Nndumi Iruva muu wafo. Nkusirye nawe akweekye.

⁶ Ashallwa usha lwafo lumike sha sa, Na usaari lwafo sha mwi elyi nkwaany.

⁷ Sya-do yoo usanguny lwa Iruva Nndumi, Mmbereye kuloote-pa, Kulasare kya ewo veefo vavesywaa, Ao elyi vavinga efo mirundyeny yaawo mikasha.

⁸ Kulasavae nta irooywa ni ngoo! Mashika itana indo ni ukiva tupu kusheende!

⁹ Vandu vetana makasha mmbo varumatwaa, Indi ewo vakusirye na Nndumi Iruva mmbo vasheningwaa uruka.

¹⁰ Irisha kyivero kyaangu, nravi ulya nkukyillolyaa-fo, mmbo kunnduyaa alya kundo ekai, nta nkushellolyaa-fo.

¹¹ Indi ewo vafoo vasheningwaa uruka; Nawo vashefuryaa uruka elo kikwaani.

¹² Nndu nravi kasuuya ulya awonisywa; Na irafunnya mayoo etirwa ni unyafi.

¹³ Indi Nndumi Iruva mmbo aseka nndu nravi, Mashika mmbo eeshi ni kufii nafike ufishyony.

¹⁴ Veekapana ni vandu varavi Usu na ngyura ni fisha fyawo Naambo vaidimi irumata ngwera na vakiva, Veedimi ishisha vandu vasaari.

¹⁵ Indi ngyupanga tawo mmbo tivalyamara wo veni, Na ngyura tawo mmbo tifishwa-fishwaa.

¹⁶ Masaa maangu a nndu nsaari na mbora Kilanya ya masaa meengyi a nndu nravi.

¹⁷ Mashika Nndumi Iruva asherumata finya ta vandu varavi, Indi asheidimisyaa ewo vasaari.

¹⁸ Nndumi Iruva ashetetera vandu vasumanu, Ni dingu yaawo ni ya llung'anu.

¹⁹ Fikashesha fyeeri fikasha mmbashaatarikaa-fo, Mmbo vashevaa na shoonga nkuka kyeeri kya shaa.

²⁰ Indi vandu varavi varumakaa. Na vakiduva va Nndumi Iruva Mmbo vashuumaa sha fivaro fyangoroshyony, Ee-da mmbo varumaka sha nsu.

²¹ Nndu nravi mmbo ashaakkwa nalaviraa, Indi nndu nsaari mmbo aviraa na ngyerya.

²² Vashewonisaa uruka ni valya, Vakee vaniinge mbora ni Nndumi Iruva. Indi valya vakee vadenge, vasherumatwaa.

²³ Nndumi Iruva ateteraa nndu. Na iringa ulya asennyo mmbwe.

²⁴ Nakwaa awa sumbai nnyakaau-fo, Mashika Nndumi Iruva ashenselesaa.

²⁵ Yeny mmbo sheekee mwana nkoo na ulaalu ni nndu nkuu, Na myaaka yakwa ni miingyi, Shindelollye Iruva are nndu nsaari-fo Ao nta mwana wakwe eterevaa shoonga-fo

²⁶ Kyeeri kyoose mmbo eefo ashakuyaa, Na vana vakwe vakava vambora.

²⁷ Lakana na varavi kutani fya usha, Naambo kukee urukeny kyeeri kyaasha;

²⁸ Mashika Nndumi iruva mmbo akunndye usaari, Nta nalareyaa valya vasumanu vakwe. Wo mmbo avaringaa llung'anu; Indi ufyari lwa varavi lusherumatwaa.

²⁹ Vasaari mmbo vaniingwa uruka Nawo vashekaa-fo llung'anu.

³⁰ Nndu nsaari marero akwe ni a urilali, Na ulumi lwakwe lukarera fya dede.

³¹ Kainndya dede ya Iruva efo nriminy wakwe; Na mirunndye yakwe ikasongova.

³² Nndu nravi kaleveya nndu nsha, Naambo naidimi immbwaa;

³³ Indi Nndumi Iruva nnareyaa, Nndu nsaari efo maakony a vakiduva-fo, Nta nnyasheniingya mwaanya wa insisya-fo.

³⁴ Vika nsia efo kwa Nndumi Iruva! Na ilatya ngyayo takwe, Nawe akuvikye ngaya kuwone uruka, Na yewo kushelollya varavi verumatwaa.

³⁵ Shilelollya nravi ngata ekekushuuwa; Eoroye singo uwe sha mieresi ya Lebanoni,

³⁶ Numa shandeira na alya ekai shilankooye! Shannduya indi shilaidimi illollya-se!

³⁷ Lola nndu nsaari, nndu nrilali, Nndu akunndye ufoo, kavikywa mbora.

³⁸ Indi valyamari wo mmbo varumatwa; Na mbora tawo tilalollyo-se lyingyi.

³⁹ Ewo varilali Nndumi Iruva asheveekya na ivakira, nawe ashevaekyaa kyeeri kya ukyiva.

⁴⁰ Nndumi Iruva ashevatarama na ivakira, Kuuka efo maakony a varavi ashevakira, Mashika mmbwe vammbikya nsia navakapannye.