SABURI 35 - BIBILLYA Mareiyo Meele a Iruva

Kiterewo Kya Weekyi

¹ Woi Nndumi Iruva ima ewo vakeshirishya. Kapana na ewo veefo vashikapaa.

² Kwiipoo ngao yafo na ifumu. Naambo kusheshitarama.

³ Ipoo ifumu na usu lwafo Kunde kwanannya na ewo vakeshilatya. Kushivie sheelyi, “Kusheshikiraa.”

⁴ Valollye usutu na isuka ewo vekeleveya muu wakwa; Vaviirwa numa vesukaa ewo vekeshifingya fya wongo.

⁵ Vave sha muulu ukevivitwa ni uraato Elyi vefo varishiswa ni vasu va Nndumi Iruva.

⁶ Shia yaawo itire ireema na kitirika, Elyi verishiswaa ni vasu va Nndumi Iruva.

⁷ Mashika valeshireiya misoori kuleifo kimaruma, Vakashiremmya kirori kuleefo kiteve.

⁸ Vawoywa tiny ni urumato! Nreiyo wawo uvatire wo veni! Vafukukye efo kiroriny kyawo veni.

⁹ Nalyo yeny shifuraa kimaruma kya Nndumi Iruva; Shinrumishe, mashika mmbwe ashikira.

¹⁰ Na nrima wakwa moose mmbo shivia Nndumi Iruva, “Ewe Nndumi Iruva, nkwiifo ungyi sha yewe-fo Yewe mmbo kwakira va fwafwa wooka efo ngyaleny ta ewo vatiri finya Vaturi naakwa ni ngwera tuuka efo kwa vasokyi.”

¹¹ Vandu vakasha mmbo vashifingya wongo. Vakasheekyerya mbony shilatiishi.

¹² Vakashitaa makasha kwa mitannyi misha, Vakashira shiike ukiveny.

¹³ Indi kyeeri valetirwa nndwari, Yeny shileraa makunnya shasokywa mfoova. Shakulyisa ukiva na ikwiima shoonga, Shainyika nrwe shivaterevyaa,

¹⁴ Sha nndu akeiiya mbuya ao mwanamaye, Sharua-rua efo na efo shisokywa mfoova sha nndu afiyyo mmaye.

¹⁵ Indi kyeeri shekee ngatareny, Wo mmbo valekuumbya andu amwi vesekaa na ishimina. Vandu shilaveeshi vakashikapa, Vakashikapa kulaifo kiimuyo.

¹⁶ Vakavaka nndu amina kitongororo, Vakashilola na irafunnya mayoo.

¹⁷ A Nndumi Iruva, mmbo kushisalallya kufike-kwi? Shuuta ngapo eto. Kukyire muu wakwa kushuute miiso eto!

¹⁸ Llyo nshekwaana efo ikwaanuny lya vandu vafo. Nshekurumishaa, nnang'ani yaawo woose.

¹⁹ Kulalekeye vakiduva ewo vakasha, vashiteende Ewo vashisuuye kuleefo kiteve. Vafure kimaruma kya mavavyo akwa.

²⁰ Mirerye yaawo nnya kififi; Na yaamba fya ureere nnang'ani ya vandu.

²¹ Vakeshikapya kyoorongye, Na ishiriingya fya wongo.

²² Indi yewe Nndumi Iruva, kuvelollye kindo ekyo. Kulamalallye woi Nndumi Iruva, Kulashekaa kwaasha na yeny.

²³ Shikapannya woi Nndumi! Kwipoo woi Iruva wakwa kulle ukiva lwakwa.

²⁴ Woi Nndumi Iruva, Iruva wakwa, Yewe ni wa usumanu, Nta kulalekeye vakiduva vakwa vashiteende.

²⁵ Kulavalekeye vaambe, “Lwammwidima! Lukamwiidima ndesa lweekundye!”

²⁶ Vare yewo vefuryaa makiva akwa Woose valemwa na ilollya usutu. Yewo woose vakulollye mbasumanu ngota yeny Valollye usutu na isuka.

²⁷ Indi yewo vakefura kyakwa yeny, Wo vafure nnu vaambe, “Lyingyi na lyingyi mmbi sha Nndumi Iruva We kasennywa kya mirunndye ya ishinga lyakwe.”

²⁸ Na yeny llyo nshambaa usha lwafo, Shiishambaa mesha afo nkonu piti.