SABURI 33 - BIBILLYA Mareiyo Meele a Iruva

Kiimbo kya Irumisha Nndumi Iruva

¹ Kapeny Nndumi Iruva mindoro, Eni vandu va dede, Rumisheny eni vamirima ikunyiisye.

² Kapeny fivale mwarafumi Nndumi Iruva, Mwimbieny na kinanda kitiri nruu ikumi.

³ Mwimbieny kiimbo kiiya; Kapeny fivale nisha na ndooro.

⁴ Irero lya Nndumi Iruva ni lya dede, Na mitannyi yakwe myoose ikavikwa nsia.

⁵ Nndumi Iruva mmbo akunndye fya usumanu; na ikunda lyakwr lyikaishura ulana loose.

⁶ Kwa ushilyi Nndumi Iruva kaumba ngina, Kaamba tive-fo, nkyeere, mwiiri, na nyinyiri.

⁷ Kaumbya mura myoose andu amwi, Na yeeve katifingya andu kumwi.

⁸ Oshoreny Nndumi Iruva ulana loose, Mwiindyeny eni vandu woose va uruka.

⁹ Mmbo alerera uruka lakatanyika! Kwa ushilyi lwakwe wo kindo kikautika.

¹⁰ Nndumi Iruva mmbwe afuluta mirumbuye ya masanga, Na makusaro awo kaasasammbwa.

¹¹ Mirumbuye ya Nndumi Iruva ni ya llung'anu; Na mitannyi yakwe ni ya fyeeri fyoose.

¹² Ngoma isanga elyo Iruva akee Nndumi Iruva waawo, Ngoma valya alevasauwa vakava vandu vakwe.

¹³ Kuuka iruveeu Nndumi iruva kalola sumbai Nafo kalollya vandu woose.

¹⁴ Kuuka kitiminy kyakwe kya ushilyi, Kalola woose vakee kunu ulaniny.

¹⁵ Mmbwe aumbye makusaro a vandu woose, Nawe kamanya wo kindo vaketana.

¹⁶ Mangyi nnyavingaa fira kimaruma, kya mamwiingyi wa vekapana-fo. Nta mwikapana nnyakooya ivinga, kyeendwa ni finya takwe-fo.

¹⁷ Frasi ikakooya ivinga nshi kindo-fo Finya takwe shiingi ntishiidima ikira nndu-fo.

¹⁸ Nndumi Iruva mmbo alolaa ewo veemwiindya, Vandu ewo vakusirye isarya lyakwe.

¹⁹ We mmbwe avakira ifwa Na ivalela kyeeri kya shaa.

²⁰ Nndumi Iruva mmbwe lummbikye nsia, We mmbwe ngyeekya na ngao yeeru.

²¹ Mmbo lufurye kimaruma kyakwe, Na ikusirya irina lyakwe yeele

²² Woi Nndumi Iruva, isarya lyafo lyikae neese, Kimmba yese lukusirye na yewe.