SABURI 29 - BIBILLYA Mareiyo Meele a Iruva

Unyanga lwa Iruva

¹ Rumisheny Nndumi Iruva, Yeni vasu va iruveeu, rumishe Iruva eto muni finya.

² Irina lya Nndumi Iruva lyiirumishwa Naakwaa ni iindywa efyo miindyeny ya iirumisha.

³ Unyanga lwa Nndumi Iruva; Lukeitiwa uwe ya mura, Nndumi Iruva akee kapa ngova, Unyanga lwa Iruva lukaitiwa uwe ya yeeve.

⁴ Unyanga lwa Nndumi Iruva, Lutiri finya nlo lukatira usuri.

⁵ Unyanga lwa Nndumi Iruva lukafisha mieresi, Ee naakwa ni mieresi y Lebanoni.

⁶ Ikaallwa mafumbu a Lebanoni, Ikakillya sha ngashe, Na ifumbu lya Hermon lyikillye Sha ngashe ya mbo-o.

⁷ Unyanga lwa Nndumi Iruva, Lukasumuta fipalapala fya muro

⁸ Unyanga lwa Nndumi Iruva, Lukareremisa kasa koomu. Na unyanga lwa Nndumi Iruva; Lukareremisa kasa ka Kadeshi.

⁹ Unyanga lwa Nndumi Iruva, Lwaringisa miri itiri finya, Ikavammbwa-fo maramba a miri ya ngoroshony, Na yewo va mmba yakwe woose vasheambaa Narumishwe we Iruva.

¹⁰ Nndumi Iruva ashillye uwe ya mura, Nndumi Iruva kakaya kiri kyakwe kya Umangyi llung'anu.

¹¹ Nndumi Iruva aniinga Vandu vakwe finya Na iniinga vandu vakwe mbora na ufoo.