SABURI 25 - BIBILLYA Mareiyo Meele a Iruva

Kiterewo kya ushilyi na uringyi

¹ Ni kwafo woi Nndumi Iruva, mwitorya, Shasha ikweengye fiterewo fyakwa.

² Ni kwafo shivikye nsia, Woi Iruva wakwa Kulashitiyye shisuke. Vakiduva vakwa valafure elyi vashivinga

³ Ee da! Valya wose vakuvikye nsia mmbasukaa-fo, Indi valya variingyi mmbo vasukaa.

⁴ Woi Iruva-mwitorya kushoore shia yafo, Ee, uramba lwafo shilumanyi.

⁵ Kushitetere efo dedeny yafo amwi na ishilosha, Mashika ni yewe Iruva mwishikira, Wo nkonu ni yewe shikuvikye nsia.

⁶ Woi Iruva mwitorya, Kummbwa ikunda na ufoo lwafo uniini A myeeri myoose na llung'anu.

⁷ Kulakummbwe ngyulyamari ta ukoo lwakwa, Nta makasha akwa, Kushikummbwe kyeendwa ni ikunda lyafo, Woi Nndumi Iruva.

⁸ Nndumi Iruva ni mfoo na mwaarya, Mmbo alosha na yoora valyamari shia

⁹ Yewo vakunyiisye kavatetera kya usha, Na ivafunda shia takwe.

¹⁰ Shia ta Nndumi Iruva shoose, Ni ta usumanu na udede, Kwa yewo vainndyaa kyaasa kyakwe, Na mavavaso akwe.

¹¹ Woi Nndumi Iruva Mwitorya, kyeendwa ni irina lyafo, Kushifwaaye ulyamari lwakwa Mashika ni uniini.

¹² Wo nndu aindye Nndumi Iruva, Mmbwe ashenloshaa meengye ashelatyaa.

¹³ Nndu yeto mmbo ashekooya mbora kyeeri kyoose, Na mmba yakwe isheniingwaa uruka.

¹⁴ Nndumi Iruva ni mbuya ya yewo vamwindyaa, Nawe kavavangisya kyaaseny kyakwe.

¹⁵ Misa akwa ni kwa Nndumi Iruva shivikye Mashika mmbwe asheutaa urende lwako, Yefo nreiyony.

¹⁶ Kushille woi Nndumi Iruva, Kushilyilye yeny nkiva na mfwafwa.

¹⁷ Kushuute yatarika lyakwa, Kushuute efo ngatareny takwa.

¹⁸ Kulle unana lwakwa na yaatarika lyakwa, Kushisarye ngyulyamari takwa toose.

¹⁹ Lola ndesa vakiduva vakwa vafye, Lla ndesa vashisuuye kikeelannya.

²⁰ Ringa muu wakwa kushikire, Shakurishya yewe, kulankunde shisuke.

²¹ Ufoo na wiidimi lwafo fishiringe, Mashika ni yewe shikuvikye nsia.

²² Woi Iruva kira vandu vafo Israeli, Kuvakire yefo ngyukiveny tawo toose.