SABURI 21 - BIBILLYA Mareiyo Meele a Iruva

Irumisha Iruva Kyeevinga

¹ Ee Iruva, mangyi atiri ifura, Mashika kulenninga finya Kakapa nndoro mashika kulemwallwa mmbingyi,

² Kulenninga kyikasennya nrima wakwe, Kwarouwa kiterewo kyakwe.

³ Kwasha kwakwe na mbora shiingyi, Na nrweny mbwakwe kwambikya-fo, Ureto lwa saabu.

⁴ Mmbo alekutereva muu mwaasha neewe kwanninga; Kwa fyeeri fiingyi llung'anu na llung'anu.

⁵ Kulemweekya kakooya iitikiswa nnu; Yewe kwansimba umasi na iindyo;

⁶ Kwansimba mbora yafo kyeeri kyoose, Elyi kwiiyo kwamwishura ifura.

⁷ Ni yewe mangyi akuvikye nsia, Yee Iruva mwitorya, Kulaifyo kindo kimmbanaa, Kyeendwa ni ikunda lyafo yewe Iruva.

⁸ Woko lwafo lwa finya, Mmbo lutiraa vakiduva vafo woose, Lutiraa ewo woose vakusuuye.

⁹ Muro nniini ushevarumataa elyi kusheshaa, Nyashi yafo ishevawoyaa, Yewe Iruva mwitorya, Nawo vasherumatwaa ni muro.

¹⁰ Ufyari lwawo mmbo lushemamitwaa, Yaa ulaniny, Na vana vawo valalollye nnang'ani a vandu.

¹¹ Naakwa vavika nntambo, Ao kyama kya ikutannya kyikasha, Na vakakyi mmbashiidimaa-fo.

¹² Mashika kuveerya mife na ivarishisa,

¹³ Kurumishwaa ee Nndumi Iruva, Kyeendwa ni finya tafo, Lushiimba na irumisha wiidimi lwafo.