SABURI 2 - BIBILLYA Mareiyo Meele a Iruva

Mangyi nsauwe wa Iruva

¹ A naambo-kyi elyi isanga mweende mwaluko-luko? A kimaruma nkikyi elyi vandu vavika shila ta nguya,

² Mangyi ta uruka tiifo tikudeesya, nawo veshillya veefo veumburanaa amwi, ifuluta Iruva mwitorya na mangyi wakwe mwaambe mafura!

³ Veshambaa Ndifony lulakani efo ushilyiny lwakwe deny, na ngova eto tilufingye tiluuke!

⁴ Nawe Iruva Mwitorya eto akaa efo Iruveeu, ee-fo evasekaa nevatatala.

⁵ Numa mmbo ashereraa nawo kwa unyafi neshevavavasa etirwa nngoo.

⁶ Ni mangyi yakwa shansauwa nasheshillya ifumbu lyakwa yeele Sioni!

⁷ Nawe mangyi mmbo asheambaa, Shamongoya ishingo lya Iruva Mwitorya, yewe ni mwana wakwa, na yeny ni Nndeyaafo.

⁸ Shitereva na yeny shikuniinge isanga lyoose lyive dingu yafo, na loose uruka luve masaa-afo.

⁹ Mmbo kuvakapaa na nsengye wa minya neevafisha sha woyo lwa nungu!

¹⁰ Naasany eni vamangyi kusareny aranyiny ivavaso elyi, yeni vamangyi va uruka.

¹¹ Rundyeny Iruva mwiinreremyaa, kapeny mindoro mwinrumishaa.

¹² Lantyeny filya fitiri mbusha, nalasheefulukwa neeni mureke shia mashika ni mwaangu irooywa ni ngoo. Ngoma nnyaawo valya vanrishyaa.