SABURI 19 - BIBILLYA Mareiyo Meele a Iruva

Itumbe lya Iruva yeto oommbye Iruveeu na ulana

¹ Iruveeu mmbo lyaloora usuri lwa Iruva, Ngina ikavambisa mashora a maako akwe.

² Nkonu ukavia nkonu ungyi, Na kio kikavia kio kingyi mbony.

³ Ekyo mmbo kyautika kirumwa, Kulaifo unyanga lushiitiwaa.

⁴ Indi naakwa ni indo, Mbony tikakwaana ulaniny koose, Marero akafika mbai ya uruka, Efo iruveeu Iruva kaallwa-fo ando ekaa nkyeere

⁵ Nato ukasomuka poo sha nsero wa walyi, Sha nsero ammekufinga asheenda shia takwe na sina

⁶ Nkyeere ukafuma ukya taari imwi ya ngyina, Neerunguka fika taari ingyi, Nta kulaifo kindo kishiidima, Ikwiisa nkukumi wa vayo.

Ivavaso Lya Nndumi Iruva

⁷ Uvavaso lwa Nndumi Iruva ni lwa dede-deny, Mmbo lwaviirya vandu muu, Ukureekyi lwa Nndumi Iruva ni lwa toki, Lukavaniinga waarya valya vakunyiisye.

⁸ Mirumbuye ya Nndumi Iruva ni ya usumanu; mavavaso a Nndumi Iruva Lyikaniinga miso ilollya, Na valya veinndya vakafura.

⁹ Iindya Nndumi Iruva ni mbony shisha uka nlung'anu, Mirumbuye ya Nndumi Iruva ni ya dede deny moose mmbo akee a usumanu. Kyeeri kyoose ni a usumanu.

¹⁰ Ilangwa kilanya ya saabu; kilanya ya ironda lya saabu shisha, Ikamuya kilanya ya ukyi, kilanya ya lakwa ya ukyi.

¹¹ Mmwasi akashiniinga wiikimbi yeny ishinga lyafo, Yiirikya lyakwa shaona-fo mbusha.

¹² A mmbi ashiidimaa ilollya ukasha lwakwe muni? Nndumi kushiliilyise na efyo fya kirika.

¹³ Kushitarame yeny ishinga lyafo, Shilakooye ilyimbwa finya ni ikurosa. Neefyo fya ishilimba finya kufiite kwaasha.

¹⁴ Marero akana kyakwa yeerikywa nyewe mbee na makusaro a nrima wakwa, Kushaarannyi na iirikya kiterewo kyakwa. Woi Nndumi Iruva isimamba lyakwa na ukiro lwakwa.